Sigurður Ingi Jóhannsson fjármálaráðherra segir að það sé fráleitt að fráfarandi ríkisstjórn sé að skilja eftir sig verra bú en upphaflega var talið eins og formaður Samfylkingarinnar hafi látið eftir sér, en hún vísaði í tilkynningu fjármálaráðuneytisins í vikunni um lakari tekjuhorfur.

Ráðuneytið greindi frá því á þriðjudag að heild­araf­koma A1-hluta rík­is­sjóðs árið 2025 væri nú áætluð nei­kvæð um 1,2% af vergri lands­fram­leiðslu. Það væri lak­ari af­koma en áætlað hefði verið við fram­lagn­ingu fjár­laga­frum­varps­ins í sept­em­ber og fjár­mála­áætl­un­ar 2025-2029 í apríl.

Frétt af mbl.is

Lakari afkoma en áætlað var

„Erfitt mál“

Kristrún Frosta­dótt­ir, formaður Sam­fylk­ing­ar­inn­ar, sagði í samtali við mbl.is í vikunni að frá­far­andi rík­is­stjórn væri að skilja eft­ir sig verra bú en upp­haf­lega hefði verið talið.

„Rík­is­stjórn­in fyrr­ver­andi er að skilja eft­ir sig verra bú, meðal ann­ars vegna þess að efna­hags­um­svif eru minni en áður var við bú­ist. Tekj­ur til rík­is­ins eru minni og þetta er auðvitað mjög erfitt mál því þarna þarf að for­gangsraða. Þarna þarf að ræða bæði tekju­hlið og út­gjalda­hlið,“ sagði Kristrún.

Frétt af mbl.is

Ríkisstjórnin „að skilja eftir sig verra bú“

Engin ný tíðindi

„Nei, það er auðvitað fráleitt. En vissulega var ekki búið að reikna upp þessi fimm ár. En þetta voru engin ný tíðindi, þau birtust við afgreiðslu fjárlaga [15. nóvember],“ sagði Sigurður Ingi að loknum ríkisstjórnarfundi í dag. 

„Þegar að ný þjóðhagsspá kemur, sem að reiknar upp að á næsta ári verði tekjur um 20 milljörðum lægri, vegna þess að hagvöxturinn í ár verði núll, en verður hann það? Það er stóra spurningin. Ellefu ársfjórðunga í röð hefur honum verið vanspáð og stundum oftar en einu sinni leiðréttur upp á við, þannig að við skulum nú bara sjá. Það getur skipt talsvert miklu máli ef að tekjur næsta árs, hvað þá þegar þú reiknar síðan fimm ár fram í tímann, hvað þær geta hækkað,“ segir fjármálaráðherra. 

Frétt af mbl.is

Bjarni: „Lítil tíðindi í þessum tölum“

Smávægilegar áskoranir að takast á við

Sigurður Ingi bendir jafnframt á, að ný ríkisstjórn þurfi að takast á við það sem að þingið hafi breytt, sem hafi verið óvenju lítið, og geri það að verkum að aðhald ríkisfjármálanna sé jafn mikið eins og fjárlögin þegar þau voru lögð fram. Og styðji þar með við lækkun verðbólgu og vaxta.

„Eðlilega þarf þá ný ríkisstjórn að takast á við þær áskoranir. Og þær eru smávægilegar,“ segir Sigurður Ingi. 

„Er kraftaverk“

„Ný ríkisstjórn þarf auðvitað að taka ákvarðanir um þessar áskoranir sem koma upp þegar að við erum að fara úr miklu hagvaxtarskeiði. Ná mjúku lendingunni sem allir eru að sækjast eftir, sem að er það að viðhalda verðmætissköpuninni, viðhalda atvinnuástandinu, en engu að síður ná þenslunni úr samfélaginu. Og það er okkur að takast og það er kraftaverk,“ bætir hann við. 

Fullur tilhlökkunar

Spurður hvernig honum lítist á nýja ríkisstjórn segir Sigurður Ingi að þetta hafi verið ákall kosninganna að hans mati.

„Þannig að væntingar um að þessir flokkar, sem að lofuðu ýmsu, um að laga allt sem úrskeiðis hefði farið, fá þá tækifæri til þess. Og ég hlakka bara til að veita þeirri stjórn eðlilega stjórnarandstöðu, aðhald, gagnrýni, uppbyggilega, lausnamiðaða og hlakka bara til þess.“

Tengdar fréttir

Alþingiskosningar 2024

Farið yfir niðurstöður kosninganna

• Ágallar á framkvæmd kosninganna
• Dagur fær formennsku í nefnd
• Finna annmarka á kosningum og vísa til Alþingis
• Tæpur hálfur milljarður í ýmsan kostnað þingmanna

» Fleiri tengdar fréttir

• Blogga um frétt