Sverri og Snorra báðum gert að greiða 1,1 milljarð

Snorri Guðmundsson, sem oft er kenndur við rafrettuverslunina Póló, og Sverrir Þór Gunnarsson, sem kenndur hefur verið við rafrettuverslunina Drekann, voru nú rétt í þessu dæmdir í Héraðsdómi Reykjaness til að greiða hvor um sig 1,1 milljarð í sekt í stóra sígarettusmyglmálinu svokallaða, samtals 2,2 milljarða. Þá hlutu þeir einnig tveggja ára skilorðsbundinn dóm fyrir þátt sinn í málinu.

Héraðsdómur samþykkti einnig upptökukröfu á ýmsum eignum þeirra, bæði fasteignum og bankainnistæðum, samtals um 200 milljónir í reiðufé auk fasteigna. 

Frétt af mbl.is

740 milljón króna sígarettusmygl

Í málinu voru þeir Sverrir og Snorri ákærðir fyrir að smygla inn sígarettum og vindlingum í níu sendingum, en í það heila var um að ræða 120.075 kart­on af síga­rett­um, eða 1.200.750 síga­rettupakka og 5.400 kart­on af reyktób­aki.

Í tollskýrslum var tóbakið ýmist tilgreint sem prótein eða pappír og ákært var fyrir undanskot sem sögð voru vera upp á 740 millj­ón­ir króna, sam­kvæmt út­reikn­ing­um rann­sókn­ar­lög­reglu­manns sem kom fyr­ir dóm­inn. Sagði  hann að meðal ann­ars hafi pen­ingaþvættið verið til skoðunar en ákveðið var að ein­blína á tolla­lagaabrot­in.

Frétt af mbl.is

„Þetta er risastórt tollalagabrot“

Fór fram á 1,4 milljarða sekt

Var þeim Snorra og Sverri, í gegnum félagið Áfengi og tóbak ehf., því gert að hafa svikist um greiðslu tóbaksgjalda og vildi saksóknari hjá embætti héraðssaksóknara að þeim yrði gert að greiða 1,4 milljarða í ríkissjóðs vegna undanskotanna.

Til viðbótar var þriðji maðurinn ákærður í tengslum við málið, en hann var einnig lykilvitni. Var réttað sérstaklega yfir honum og hlaut hann sex mánaða skilorðsbundið fangelsi fyrir sinn þátt í málinu, en um er að ræða karlmann á fimmtugsaldri sem starfaði hjá Thorship á árunum 2012-2018. Var hann sölumaður hjá Thorskip og hafði verið í mestum samskiptum við þá Snorra og Sverri.

Eins árs fangelsi ef sektin er ekki greidd

Í dómi héraðsdóms segir að bæði Snorri og Sverrir skuli sæta tveggja ára skilorðsbundnu fangelsi. Þeim er hins vegar gert að greiða sektina upp á 1,1 milljarð hvor um sig, samtals 2,2 milljarða, vegna ógreidds tóbaksgjalds innan fjögurra vikna. Ef þeir gera það ekki þá skulu þeir sæta fangelsi í eitt ár.

Þegar kemur að upptöku eigna samþykkti dómurinn kröfur saksóknara. Hjá Sverri er um að ræða stórt ein­býl­is­hús í Garðabæ, lítið iðnaðar­hús­næði í Reykja­vík og um 55 milljónir sem voru fjármunir sem fundust á heimili hans, reikningum og í bankahólfi. Stór hluti þess er þó 40 millj­ón­ir sem lagðar voru að veði fyr­ir 17 Rol­ex úr sem hann fékk af­hent að nýju eft­ir að sak­sókn­ari hafði hald­lagt þau við hús­leit­ina.

Í til­felli Snorra er um að ræða 50% eign­ar­hluta hans í sum­ar­húsi í Blá­skóga­byggð, at­vinnu­hús­næði í Stykk­is­hólmi og stóru ein­býl­is­húsi í Garðabæ. Þá eru gerðir upptækir fjármuni upp á 133,6 milljónir, en þar af eru 12 millj­ón­ir sem lagðar voru að veði fyr­ir sjö úrum sem hald­lögð voru af héraðssak­sókn­ara á heim­ili hans.

Að lokum er gerð upptæk síðasta vörusendingin af þeim níu sem ákært er fyrir í málinu, en í henni voru um 44 þúsund karton af sígarettum.

Deilt var um ábyrgð á tollflokkuninni fyrir dómi

Í ákæru og við aðalmeðferð málsins vísaði saksóknari til þess að þeir Sverrir og Snorri hafi komið því til leiðar við starfsmanninn að tilgreina ranga vörutegundir á aðflutningsskýrslum fyrir tollafgreiðslu, en vörulýsingum hafði verið breytt handvirkt úr sígarettum og tóbaki í sígarettupappír og filter í kerfum Thorship og við það féllu vörurnar í annan tollflokk.

Eng­inn hjá fyr­ir­tæk­inu greip þetta og var ekki gerð at­huga­semd við þetta fyrr en toll­verðir hjá toll­stjóra opnuðu send­ingu árið 2018, þá ní­undu sem hafði komið til lands­ins und­ir öðrum toll­núm­er­um en því er til­grein­ir tób­akið. Við þeim blasti 4 tonna gám­ur sem var full­ur af síga­rett­um.

Mennirnir fluttu sígaretturnar og reyktóbakið inn á árunum 2015 til 2018. Í stað þess að gefa upp raunverulegan farm sögðu þeir að um væri að ræða prótín og pappír og komust þannig hjá því að greiða 740 milljónir í tóbaksgjald og skatta. mbl.is/Árni Sæberg

Lykilvitnið vísaði fyrir dómi til þess að tolla ætti eftir því sem segði í reikningum sendingar en ekki í vörulýsingu. Að sögn vitn­is­ins sendi hann reikn­ing­ana alltaf frá sér, en send­ing­arn­ar voru engu að síður rang­lega toll­flokkaðir.

Fyrir dómi kom hins vegar einnig fram að hann hafi í þrígang farið í boðsferð með Áfengi og tóbaki, meðal annars til London á bardaga með Gunnari Nelson, en einnig til Las Vegas.

Frétt af mbl.is

„Málið er einfalt“: Bendir á tollamiðlarann

Verjendur Snorra og Sverris töldu við aðalmeðferð málsins að ábyrgð í málinu falli á herðar tollamiðlarans Thorship sem hafi haft veg og vanda af því að gera tollskýrslurnar.

Þá var einnig tekist nokkuð á um fyrningu brotanna og hvort að fyrningarfresturinn ætti að vera fimm eða tíu ár.

Uppfært: Í upphaflegri frétt mátti skilja það svo að Sverrir og Snorri hefðu samtals verið dæmdir til að greiða 1,1 milljarð í sekt í málinu. Hið rétta er að þeir þurfa að greiða 1,1 milljarð hvor um sig, eða samtals 2,2 milljarða. Hefur texti í fréttinni verið lagfærður svo þetta fari ekki á milli mála.

• 1 blogg um fréttina

Bloggað um fréttina

• Guðmundur Jón Friðriksson: Þvílíkt grín...