Bónorð, unaðsvörur og frumsamin ljóð efst á gjafalistanum

Valentínusardagurinn skipar stóran sess í hjörtum starfsfólks Póstsins, en það hefur í gegnum árin aðstoðað fjölmarga við að koma fallegum kveðjum og óvæntum glaðningum til sinna heittelskuðu í tilefni dagsins.

„Við höfum brugðið á leik undanfarin ár í kringum Valentínusardaginn,“ segir Kristín Inga Jónsdóttir, forstöðumaður markaðsdeildar Póstsins.

„Við ákváðum að halda í þá skemmtilegu hefð nú sem endranær, en þó með örlítið breyttu sniði en áður. Í fyrra stilltum við til dæmis fallega hjartapóstkassanum okkar upp í Kringlunni þar sem fólki gafst kostur á að skrifa sjóðheit ástarbréf og krúttleg kærleikskort fyrir sitt besta fólk og stinga í póstkassann. Við komum kveðjunum svo í réttar hendur,“ segir Kristín Inga.

Hún segir að í ár hafi áhersla verið lögð á einfaldleikann og þægindin við að nota Póstbox. „Þannig að í ár dreifðum við Valentínusargleðinni í boxin og komum líka nokkrum viðskiptavinum sem voru að sækja eða senda í Póstbox á óvart með því að færa þeim blómvendi.“

Persónulegar gjafir á óskalistanum

Að sögn Kristínar lét Pósturinn ekki þar við sitja heldur hafi líka verið blásið til leiks með nokkrum laufléttum spurningum sem tengdust Valentínusardeginum og þar hafi greinilega komið í ljós að margir séu rómantískir og ætli að sýna það í verki á degi ástarinnar.

„Við fengum um eitt þúsund svör og sögðust 90% þátttakenda ætla að gleðja einhvern á Valentínusardaginn, sem okkur fannst skemmtilegt að sjá. Við spurðum líka hvað væri það rómantískasta sem svarendur gætu hugsað sér að fá sent í Póstbox og þar áttu bónorð, unaðsvörur, frumsamin ljóð, skartgripir, konfekt, gjafabréf í dekur og græjur fyrir veiðimanninn vinninginn á óskalistanum,“ segir Kristín Inga.

Það er því greinilegt að persónulegar gjafir sem komi beint frá hjartanu séu það sem fólk óski sér helst á þessum rómantíska degi.

„Hins vegar kom það okkur á óvart að um helmingur svarenda sagðist ekki eiga von á því að fá neinn glaðning á Valentínusardaginn, svo ég vil hvetja fólk til að halda ekki aftur af ástarjátningunum, koma uppáhalds manneskjunni sinni skemmtilega á óvart og leyfa rómantíkinni að ráða ríkjum í dag. Helst auðvitað alla daga, allt árið um kring.“

• Blogga um frétt