Segir áform Carbfix á Húsavík vera „vafasöm“

Haraldur Sigurðsson, eldfjallafræðingur og prófessor emeritus, spyr hvaða áhrif langvarandi niðurdæling koltvísýrings (CO2) hafi á spennusvið jarðskorpunnar á Húsavíkursvæðinu.

Hann segir í færslu á Facebook að áform Carbfix á Húsavík séu vafasöm.

Carbfix er með áform um að reisa svokallaða coda-stöð á Bakka á Húsavík og á dögunum hélt fyrirtækið íbúafund til að kynna áformin og svara spurningum.

Húsavíkursvæðið er virkt skjálftasvæði

Haraldur segir að einn heimamaður hafi spurt um jarðskjálftahættu vegna niðurdælingar en fengið þau svör að aðeins væri dælt niður á 300-1.000 metra og því væri verkefnið hættulaust.

„Nú veit allur almenningur að Húsavíkursvæðið er eitt virkasta skjálftasvæði landsins. Enda heitir flóinn fyrir framan bæinn Skjálfandi. Þarna er vinkilhorn á flekamótum, þar sem norðurhluti gosbeltisins tengist við Flateyjarmisgengið til vesturs. Hér hafa gengið yfir sumir stærstu skjálftar Íslands, eins og skjálftinn árið 1755 (7,0 M), og 1838, og síðan tvöfaldur skjálfti árið 1872 (6,5 til 7). Maður spyr, hvaða áhrif getur stöðug og langvarandi niðurdæling haft á spennusvið jarðskorpunnar?“ skrifar Haraldur.

Hann segir að fleiri spurningar komi upp í sambandi við „þetta vafasama verkefni“. Hann telur það mistök að dæla niður koltvísýringi á Íslandi.

„Slíkt verkefni á heima úti á Reykjaneshrygg,“ skrifar hann.

• Blogga um frétt