Persónuverndarlög gilda einnig um stjórnvald
Setja bókamerki
Bjarni Freyr Rúnarsson, lögfræðingur og sviðsstjóri eftirlitssviðs Persónuverndar, segir kvörtun Ólafar Björnsdóttur, fyrrverandi tengdamóður barnsföður Ásthildar Lóu Þórsdóttur, til Persónuverndar snúa að miðlun persónuupplýsinga Ólafar frá forsætisráðuneytinu til Ásthildar Lóu.
Spurður um miðlun hvaða persónuupplýsinga segir Bjarni að um samskiptaupplýsingar sé að ræða en hann geti ekki rætt efnistök kvörtunarinnar að öðru leyti.
Meta tilefni til rannsóknar
Um miðlun og vinnslu persónuupplýsinga stjórnvalds segir Bjarni gilda sömu reglur og um aðra ábyrgðaraðila. „Persónuverndarlögin gilda alveg óháð því hvort um stjórnvald eða fyrirtæki er að ræða,“ segir Bjarni.
Grundvallaratriðin segir hann vera að heimild standi til vinnslunnar og að vinnslan uppfylli meginreglur sem séu að ýmsum toga og lúti meðal annars að gagnsæi og sanngirni.
„Það er fjallað um þetta í 8. gr. persónuverndarlaga,“ segir hann.
Næstu skref eftir að kvörtun berst eru að sögn Bjarna að sérfræðingar Persónuverndar leggja mat á það hvort hún gefi tilefni til rannsóknar og þá að hvaða marki. Bjarni segir að stofnunin hafi sett sér ákveðin viðmið hvað það varðar.
„Persónuvernd tekur mál til úrlausnar að undangenginni rannsókn en það hefur ekkert verið ákveðið með þetta mál hvað verður,“ segir Bjarni.
„Hún fer í ríkissjóð... svona eru lögin“
Hann segir þá að stjórn Persónuverndar taki ákvarðanir í ákveðnum stefnumarkandi málum og í sumum tilvikum öðrum málum. Ef t.a.m. sé lögð á stjórnvaldssekt hafi stjórn stofnunarinnar aðkomu að ákvörðun hennar.
Persónuvernd getur sektað annað stjórnvald en Bjarni segir þá heimild ekki algilda á evrópska efnahagssvæðinu.
„Við höfum m.a. sektað ráðuneyti, atvinnuvegaráðuneytið vegna Yay-appsins svokallaða. Þannig að það eru alveg heimildir fyrir því.“
Hvert fer greiðsla sektar sem Persónuvernd leggur á stjórnvald?
„Hún fer í ríkissjóð,“ segir Bjarni og blaðamaður skellir upp úr. Aðspurður segist Bjarni nú sjálfur alveg geta séð spaugilegu hliðina á því, „en svona eru nú lögin.“
Selenskí: Jákvætt merki
Vopnahlé á milli Indlands og Pakistans
„Þessi samningur er svo ævintýralega vitlaus“
Sérstaklega skaðlegt fyrir börn
Fresta tollunum um 90 daga
PCC óskar eftir viðskiptavernd í formi tolla
Tillaga Pútíns „ekki nóg“