Rekstrarniðurstaða Eflingar jákvæð um 1,3 milljarða

Sólveig Anna Jónsdóttir, formaður Eflingar, segir viðsemjendur stéttarfélagsins hafa leitað allra leiða til að komast hjá því að greiða að fullu þær launahækkanir sem samið var um í stöðugleikasamningunum á síðasta ári.

Hún segir Eflingarfólk bera mesta ábyrgð í þjóðfélaginu. Raunveruleg auðsköpun verði til með vinnu verkafólksins, sem noti bæði vöðvaafl og vitsmuni til að halda uppi grundvallarkerfum landsins á almenna og opinbera vinnumarkaðinum.

Þetta kemur fram í formannsávarpi hennar í ársskýrslu Eflingar.

„[V]ið framleiðum verðmætin og búum til hagvöxtinn, sem allt samfélagið nýtur svo góðs af. Við í Eflingu setjum fram einbeitta og háværa kröfu um að þessi staðreynd fáist viðurkennd,“ segir í ávarpinu.

„Við erum vinnuafl höfuðborgarsvæðisins – okkar vinna skapar verðmætin og knýr áfram hagvöxtinn. Það er því óþolandi að sjá bæði almenna og opinbera viðsemjendur félagsins ganga á bak gerðum samningum við okkur.“

Í tilkynningu Eflingar um ársskýrsluna kemur jafnframt fram að kostnaður hafi fylgt verkefnum Eflingar á síðasta ári. Alls hafi þó rekstrarniðurstaðan verið jákvæð um tæpa 1,3 milljarða króna.

• Blogga um frétt