Veitur ætla að banna einkabílinn í Heiðmörk

Veitur áforma að loka bílaumferð almennings um Heiðmörk og gera ráð fyrir bílastæðum í jaðri útivistarsvæðisins. Þetta staðfestir Sólrún Kristjánsdóttir framkvæmdastýra Veitna í skriflegu svari til Morgunblaðsins.

Jóhannes Benediktsson, formaður Skógræktarfélags Reykjavíkur, segir félagið hafa miklar áhyggjur ef takmörkun bílaumferðar um Heiðmörkina verði að veruleika. Það muni draga úr aðsókn gesta ef fólk þurfi að ganga einhverja kílómetra að þeim svæðum þar sem viðburðir fara fram.

Takmarkanir á umferð í Heiðmörk eru ekki nýtilkomnar. Nú þegar hafa Veitur bannað Heiðmerkurhlaupið og hafa heimsóknir leikskólabarna verið takmarkaðar auk annarra viðburða sem hafa verið vinsælir í Heiðmörk.