Berjast fyrir því að taka inn nemendur á hverju ári

Aðeins séu átta teknir inn í umrætt diplómanám og það verði nú aðeins gert annað hvert ár.

„Þetta er eina menntaleiðin innan Háskóla Íslands sem stendur einstaklingum með þroskahömlun til boða. Það eru átta teknir inn í námið á ári. Samt eru það þeir sem kerfið ákveður að skera niður. Þetta er til skammar og ekki boðlegt að koma fram með þessum hætti,“ skrifar Guðmundur.

Mikið stökk

Ástríður segir að boðið hafi verið upp á námið síðustu 17 ár og það hafi vakið athygli víða um heim. Frá upphafi hafi nemendur verið teknir inn annað hvert ár en eftir covid hafi verið tekið inn þrjú ár í röð.

„Það er mikið stökk að fara í að taka inn tvo árganga í einu. Til þess þarf fleira starfsfólk og betra utanumhald. Ef það á að vera unnt þarf stuðning frá stjórnvöldum.“

Styrkja þarf lagaumgjörð og auka fjárveitingar en til þessa hafi Háskólinn þurft að taka af eigin fé til að standa undir náminu. „Það hefur enginn beinn stuðningur komið og þessi nemendahópur þarf stuðning.“

Fleiri skólar vilja sinna þessum hópi

Ástríður kveðst telja að námið hafi margsannað ágæti sitt. Hún vonast til að stuðningur fáist frá stjórnvöldum. Það ásamt flutningi í betra húsnæði á Sögu muni gera Háskóla Íslands kleift að taka inn nemendur á hverju ári. Góðu fréttirnir séu þær að fleiri skólar vilji sinna þessum hópi.

„Við höfum verið í gjöfulu samstarfi við Háskólann á Akureyri og Listaháskólann. Á Akureyri á að byrja með tilraunaverkefni í haust þar sem verða teknir inn 1-3 nemendur. Í Listaháskólanum er áhugi á að feta sig áfram og ég á fastlega von á því að nemendur frá okkur taki valnámskeið þar. Þessir skólar hika samt vegna þess að það er ekkert fast fjármagn í hendi. Það þarf að styrkja og skýra þetta umhverfi.“