Innlent | mbl | 19.4.2025 | 14:46

Bora tvo kílómetra í leit að vatni fyrir Hafnarfjörð

Starfsmenn Jarðborana og stjórnendur borverksins af hálfu HS Orku á borteignum við Sveifluháls standa með jarðborinn Óðinn í baksýn. Ljósmynd/Aron Ingi Gestsson

HS Orka borar nú tveggja kílómetra langa tilraunarborholu í Krýsuvík í von um að rannsóknin leiði til framleiðslu á heitu vatni fyrir Hafnarfjörð og höfuðborgarsvæðið auk rafmagns inn á landskerfið.

Í gærmorgun hóf HS Orka að bora fyrstu djúpu rannsóknarborholuna við Sveifluháls í Krýsuvík en borunin er hluti af jarðhitarannsóknum orkufyrirtækisins á Krýsuvíkursvæðinu. Öllum yfirborðsrannsóknum er lokið og nú taka við rannsóknir með djúpborun.

Þetta kemur fram í tilkynningu en Krýsuvíkursvæðið hefur hingað til verið metið hátt sem jarðhitasvæði til nýtingar fyrir orkuvinnslu.

Áætla að bora 2.750 m holu

Áætlað er að stefnubora allt að 2.750 metra langa holu niður á ríflega tveggja kílómetra dýpi undir Sveifluhálsinn til norðvesturs.

Markmiðið er að auka þekkingu á jarðhitakerfinu, sannreyna tilvist háhitaauðlindar og meta nýtingu hennar á svæðinu Sveifluháls – Austurengjar, að því er fram kemur í tilkynningunni.

Hafnarfjarðarbær er eigandi þess hluta Krýsuvíkursvæðisins sem rannsóknirnar fara fram á.