Strandaglóparnir komast að óbreyttu heim í kvöld

Íslendingar sem hafa verið strandaglóp­ar í Bar­sel­óna á Spáni síðan í gærkvöldi munu að óbreyttu komast heim í kvöld þar sem Play hefur tekið flugvél á leigu til að koma hópnum heim.

Um hundrað Íslend­ing­ar, þar af um 90 pilt­ar, urðu strandaglópar þegar flugi þeirra á veg­um Play var snúið við vegna bil­un­ar, eins og mbl.is greindi frá fyrr í dag.

Um er að ræða tvo knattspyrnuhópa, annan frá Grindavík og hinn frá Akranesi, sem voru á Spáni til að spila á Costa Daurada-mótinu.

Frétt af mbl.is

Fótboltastrákar urðu að strandaglópum í Barselóna

Gera við vélina

Stefnt er að því að gera við vélina sem bilaði en Birgir Olgeirsson, sérfræðingur í almannatengslum hjá Play, segir í samtali við mbl.is að flugfélagið hafi auk þess leigt aðra vél til að koma hópnum heim. 

Sú vél fari að óbreyttu í loftið kl. 20.15 að spænskum tíma, 18.15 að íslenskum tíma.

Ferðalangarnir sváfu á flug­vall­argólf­inu í nótt en í dag renna út skjöl sem gera fararstjórum kleift að ferðast með strákana.

Hálf­ur hóp­ur­inn hef­ur gripið til þeirra örþrifaráða að fljúga til Pól­lands og síðan þaðan heim. Tösku með vega­bréf­um var rænt af þeim í nótt.

• Blogga um frétt