Íbúðir leyfðar við Austurvöll?

Frétt af mbl.is

Stuðst við 85 ára gamla teikningu

Myndin sýnir hugmyndir arkitekta að breyttu útliti. Meðal annars má sjá að svalir hafa verið settar upp. Tölvumynd/THG arkitektar

Leyfa íbúðir sem áður voru skrifstofur

Breytt notkun samkvæmt deiliskipulagi verður sú að leyfa íbúðir á efri hæðum þar sem áður voru skrifstofur. Þá verði leyfilegt að hafa skrifstofur/veitingarými á efri hæðum eftir atvikum.

Sömuleiðis verði leyft að breyta útliti húsanna og setja svalir á þau svo að húsnæðið uppfylli skilyrði fyrir íbúðir.

Aðrar og smærri breytingar verði á núverandi kvistum og bætt við kvistum á húsum nr. 12 og 12a.

Loks að leyft verði að setja léttbyggð skyggni yfir útisvæði veitingastaða við Austurvöll, enda er áfram gert ráð fyrir veitingastarfsemi á 1. hæðum og kjallara bygginganna.

Áfram verður veitingastaður á þakhæð Austurstrætis 12, Vinnustofa Kjarvals.

Notkun húsanna nr. 8-10, 12, 12a og 14 verði breytt þannig að leyfðar verði allt að 36 íbúðir af fjölbreyttum stærðum á hæðum 2-5 að uppfylltum skilyrðum um hljóðvist, enda megi reikna með einhverju ónæði af veitingarekstri sem er heimill fram á nótt.

Hús númer 10a er ekki hluti af þessum breytingum enda í eigu annarra. ÁTVR rekur vínbúð á 1. hæð hússins.

Tilgátumyndir að breyttu útliti fylgja með greinargerðinni en tekið er fram að það séu aðeins hugmyndir, ekki endanlegt útlit.

Frétt af mbl.is

Nýtt útlit Austurstrætis kostar um 500 milljónir

Á góðviðrisdögum á sumrin flykkist fólk í miðborgina til að njóta sólar og veitinga utandyra. Oft getur reynst erfitt fyrir fólk á fá borð. mbl.is/Kristinn Magnússon

Mikilvæg almenningsrými

Í greinargerð THG-arkitekta segir að svæðið sem deiliskipulagstillagan nái til snerti tvö mikilvæg almenningsrými í miðborginni, Austurvöll og Austurstræti, sem hvort um sig gegni ákveðnu hlutverki.

„Allar breytingar og endurbætur skulu gerðar með virðingu fyrir uppruna og stíl viðkomandi byggingar og götumyndar,“ segir í greinargerðinni.

Um sé að ræða verndaða götumynd þar sem húsin eru ýmist friðuð eða umsagnarskyld. Þau eru byggð á árabilinu 1921 til 2000. Samráð skal hafa við Minjastofnun Íslands um allar breytingar sem kunna að verða gerðar.

Sumarið 2023 sendu Reitir fyrst til Reykjavíkurborgar fyrirspurn um hvort breyta megi efri hæðum húsa á lóð 12-14 við Austurstræti í íbúðir samkvæmt uppdráttum THG-arkitekta.

Þær væru ætlaðar til langtímaleigu enda skammtímaleiga óheimil á svæðinu. Þá var gert ráð fyrir að fjöldi íbúða yrði 26.

Alþingi leigði hæðir í húsunum undir skrifstofur alþingismanna. Þeir hafa flutt í hið nýja skrifstofuhús Alþingis, Smiðju við Vonarstræti.

Skipulagsfulltrúi Reykjavíkur tók jákvætt í fyrirspurnina 2023 en með skilyrðum. Benti hann sérstaklega á mikilvægi hljóðvistar.

Nú, tveimur árum síðar, er erindið að nýju komið á borð skipulagsfulltrúa. Sú breyting hefur m.a. orðið að ekki er lengur tiltekið sérstaklega að íbúðirnar séu ætlaðar til langtímaleigu.