Lítum upp úr símunum og sýnum meiri kærleika

Guðrún Karls Helgudóttir biskup Íslands flutti í morgun páskapredikun í Dómkirkjunni í Reykjavík þar sem hún sagði guðspjall dagsins, um upprisu Jesú Krists, vera sögu án endis. Hún minnti á þjáningar fólks í stríðshrjáðum löndum og hvatti Íslendinga til að standa vörð um mannréttindi og kærleika í samfélaginu.

„Guðspjall dagsins er saga án endis,“ sagði biskup og vísaði til frásagnarinnar af tómri gröf Jesús og undrun kvennanna, Maríu Magdalenu, Maríu móður Jakobs og Salóme, sem komu þangað á páskadagsmorgun.

„Þær sjá þarna ókunnugan mann í hvítri skikkju sem segir þeim að vera ekki hræddar. Steinninn var farinn, Jesús var horfinn og undarlegur maður situr inni í gröfinni og segir þeim að Jesús sé upprisinn og farinn á undan þeim. Þær fá það hlutverk að segja hinum lærisveinunum frá þessu.“

Upprisa Jesú Krists breytir öllu

Hún líkti þessari atburðarás við stöðu okkar í dag.

„Við erum, eins og konurnar þrjár, beðin um að trúa því að Jesús sé upprisinn. Eins og þær, erum við beðin um að færa boðskapinn áfram. Okkur er boðið að trúa á eitthvað sem getur breytt lífi okkar, snúið öllu gildismati á hvolf. Upprisa Jesú Krists breytir öllu og hún er án endis því henni er ekki lokið. Hún er öllum opin og hún rennur ekki út.“

Ábyrgðin okkar í samtímanum

Guðrún Karls lagði áherslu á að upprisuboðskapurinn fæli í sér bæði von og ábyrgð fyrir þá sem lifa. „Upprisan býður okkur að trúa því að hið góða sigri, en hún gerir líka þá kröfu til okkar að við tökum ábyrgð.“

Hún minntist á átök og þjáningar í heiminum og nefndi sérstaklega morðið á úkraínskum píanóleikara í síðustu viku á leið í helgihald, ástandið á Gasa og hungursneyðina í Súdan.

„Það sem við getum þó gert er að taka afstöðu. Ekkert okkar vill hafa þetta svona. Ekkert okkar vill stríð og við megum segja það. Við megum mótmæla því að verið sé að drepa saklaust fólk. Það er afstaða sem við getum tekið, og við eigum að taka.“

Ekki pólitísk afstaða – bara rétt

Biskup ræddi einnig um þá þróun að mannréttindi virðast vera orðin umdeild í ákveðnum hópum. Hún sagði að það væri skylda okkar að standa með því sem er rétt.

„Það er ekki pólitísk afstaða að fordæma barnamorð, hungurdauða eða sprengjuárásir á börn og aðra saklausa borgara á leið í messu. Það er bara rétt afstaða.“

Hún hvatti Íslendinga til að verja þau grunngildi sem samfélag okkar byggir á.

„Nú ríður á að við stöndum vörð um okkar frjálsa samfélag, um mannréttindi allra og látum ekki peningaöflin breyta því sem er satt og rétt og flokkspólitík gera okkur blind í afstöðu okkar.“

Þurfum að sýna meiri kærleik

Biskup hvatti til aukins kærleika og samkenndar í samfélaginu, sérstaklega í ljósi morða í íslensku samfélagi á síðasta ári, þar sem börn voru einnig fórnarlömb.

Hún vitnaði í Vigdísi Finnbogadóttur, fyrrverandi forseta Íslands, og sagði að stærsta áskorun Íslendinga væri að halda áfram að vera heiðarlegt fólk.

„Þetta ákall snýst um að við sýnum börnum þessa lands meiri kærleika og lítum upp úr símunum okkar um leið. Þetta ákall snýst um að við sýnum náunga okkar, hver sem hann er, meiri kærleika og minna tómlæti,“ sagði Guðrún.

Hið góða sigrar ávallt að lokum

Að lokum sagði biskup að páskadagur væri ekki endir heldur byrjun. Hlutverk okkar væri nú að segja frá því sem við trúum á, standa með þeim sem verða undir og standa með mannréttindum allra. 

„Það skiptir öllu að við séum réttlát, sýnum náunganum kærleika, forðumst tómlæti og stöndum með fólki. Það getum við meðal annars með því að fylgja Jesú eftir eins og konurnar forðum sem komu að gröfinni til að annast ástvin sinn.

Að við breiðum út gleðiboðskap páskadags um að Jesús sé upprisinn. Að hið góða hafi sigrað og að hið góða sigri ávallt að lokum. Þannig tökum við þátt í að skapa betri endi á sögunni sem þó aldrei lýkur.“

• Blogga um frétt