Búseti, sem er eigandi fjölbýlishúss sem er 14 metra frá vöruskemmunni, telur hins vegar að hvorki séu heimildir fyrir starfrækslu kjötvinnslu á lóðinni í aðal- né deiliskipulagi. Búseti gerir einnig alvarlega athugasemd við það að ekki hafi farið fram umhverfismat eins og lög gera ráð fyrir við gerð deiliskipulagsins.

Herða skal kröfur

Kjötvinnsla Ferskra kjötvara hefur til þessa verið til húsa að Síðumúla 34. Heilbrigðiseftirlitið telur fyrirhugaða kjötvinnslu við Álfabakka geta valdið töluverðu ónæði meðal annars vegna hávaða sem berst frá kæliviftum og kælipressum allan sólarhringinn. Eftirlitið telur þetta geta valdið ónæði þrátt fyrir að fyrirhugað sé að reisa hljóðvegg sem dempa eigi hávaðann.

Einnig hefur Heilbrigðiseftirlitið áhyggjur af því að aukin þungaumferð hafi áhrif á öryggi á svæðinu, þá sérstaklega gangandi og hjólandi vegfarenda, en vöruskemman er við íþróttasvæði ÍR og því mikið um börn á svæðinu.

Heilbrigðiseftirlitið telur þó að hægt sé að koma í veg fyrir flest vandamál sem kunna að koma upp vegna kjötvinnslunnar með því að herða þær kröfur sem gerðar eru í starfsleyfi hennar. Því eigi hún ekki að vera háð mati á umhverfisáhrifum.

Á ekki heima í íbúabyggð

Frank Ú. Michelsen, slembivalinn fulltrúi íbúa í Íbúaráði Breiðholts, segir í umsögn fyrir íbúaráðið að það sýni fyrirlitningu og virðingarleysi ráðandi afla Reykjavíkurborgar gagnvart íbúum Breiðholts að vöruskemma sem þessi hafi verið sett á svæði þar sem er íþróttasvæði og mikil umferð gangandi barna og eldri borgara. Frank telur að kjötvinnsla eigi ekki heima í íbúahverfi.