Óskar eftir tilboðum í verðlaunastyttur

Edduverðlaun og verðlaun fyrir Djöflaeyjuna og Bíódaga

Segist hann eiga mikið safn gripa, t.d. alls kyns styttur og vasa úr keramiki. Meðal þess sem hann hefur sett á sölu á Facebook eru nokkur Edduverðlaun og styttur fyrir norræn verðlaun sem hann hlaut fyrir annars vegar Djöflaeyjuna og hins vegar Bíódaga.

„Það sem ég hef auglýst er bara smá hluti af því sem ég á. Þetta er bara svona einn tuttugasti.“

Er þér alvara með því að selja þetta allt saman frá þér?

„Mig langaði að prufa það. Svo er ekkert útséð með hvað verður um Kvikmyndaskóla Íslands þannig að maður bíður sennilega aðeins,“ segir Friðrik, sem finnst gripirnir eiga heima þar sem fólk á leið um.

Spurður hvort ekki verði eftirsjá að gripunum hjá fólkinu í kringum hann segir Friðrik að það geti vissulega verið.

„Það aukast auðvitað öll verðmæti þegar maður drepst. Núna stendur maður á sjötugu og fólk er að hrynja niður í kringum mann.“

Frétt af mbl.is

Kennir stjórnvöldum um fall skólans

Fer eftir verðinu á kopar

Hafa einhver tilboð borist og hvað viltu fá fyrir eins og ein Edduverðlaun?

„Það fer bara eftir verðinu á kopar, þær eru úr kopar.“

Hvað eru þær þungar?

„Þær eru alveg meira en kíló. Það sagði mér nú einn að koparverðið færi hækkandi svo mér liggur í sjálfu sér ekkert á,“ segir Friðrik og hlær en heimsmarkaðsverð á kopar er í dag á milli 18 og 20 dollarar á kílóið.

Frétt af mbl.is

Rafmennt kaupir Kvikmyndaskólann

Ádeila í bland

Hann er leyndardómsfullur þegar hann er spurður hvort einhver tilboð hafi borist í gripina og segir nú marga taka þessu sem djóki, „sem það er nú kannski líka í bland,“ segir Friðrik og samsinnir því að gjörningur hans sé að vissu leyti ádeila á hvað sé að verða um Kvikmyndaskólann.

„Það er illa farið með Kvikmyndaskóla Íslands. Það er nú bara einhver mesti skandall sem hefur orðið í íslenskri skólasögu myndi ég segja. Þetta er ótrúleg aðför að eigendum skólans. Að neita fólki um nám sem það vill fara í er bara skandall sem verður að leiðrétta sem fyrst.

Hvort endurreisn skólans verði eða ekki mun koma í ljós. Það væri best því það er rosaleg kunnátta og þekking innan hans. Það er búið að skapa þennan skóla í 32 ár og hann var kominn í farveg sem var ekkert hægt að bæta mikið meir. Það eina sem stjórnvöld þurftu að gera var að koma honum á háskólastig.“

Frétt af mbl.is

Ráðuneytið hafi neitað aðstoðinni

Meiri brandari en salan á styttunum

Friðrik segist ekki vera búinn að sjá það gerast að skólinn verði að einhvers konar iðnnámi. 

„Fólk sem hefur ekki kynnt sér málin og hefur ekkert vit á kvikmyndamenntun talar niður kvikmyndagerð því það virðist halda að þetta sé bara einhver tómstundaiðja,“ segir Friðrik.

Tekur hann dæmi um ummæli skólastjóra Tækniskólans, sem hafi sagt að Tækniskólinn væri nú einnig með listnám, þar væri grafísk hönnun og ljósmyndun.

„Ég held að svona komment sé nú bara meiri brandari en salan á styttunum,“ segir Friðrik Þór.