Vinirnir óttast að lenda á svörtum lista

Kristján Gunnarsson, nemandi í hagfræði við Harvard-háskóla, segir fátt meira rætt þessa dagana en atlögu Donalds Trumps Bandaríkjaforseta að skólanum. Um 2,2 milljarða dollara, eða því sem nemur um 280 milljörðum króna, framlag til skólans hefur verið fryst auk þess sem forsetinn hefur hótað því að atvinnuleyfi, sem skólinn hefur heimild til að veita til nemenda, verði afturkallað.

Sjálfur er Kristján á lokaári í náminu og stefnir á að vinna á Íslandi að námi loknu. Hann segir vina sína marga hverja með böggum hildar yfir framtíð sinni. Þeir eru Evrópubúar og Indverjar og hafa fengið starfstilboð í Bandaríkjunum eftir að námi lýkur en á þessari stundu vita þeir ekki hvort þeim verði heimilt að dvelja í landinu þegar þar að kemur.

Vita ekki hvort atvinnutilboðin standa 

„Trump er búinn að hóta því að taka réttinn af Harvard til að útdeila landvistarleyfum og því vita nemendur ekki hvort atvinnutilboðin standi eða hvað verður eftir útskrift. Þessi óvissa fer mjög illa í fólk,“ segir Kristján.

Nemendur víðsvegar um Bandaríkin hafa mótmælt árásum á Gasasvæðið. AFP

Harvard hóf málsókn gegn ákvörðun Trump-stjórnarinnar um að frysta fjármagn til skólans. Stjórnin hefur einnig haft horn í síðu elítuskóla á borð við Brown, Columbia og Princeton. Þar til í gær var hins vegar Harvard sá eini sem spyrnti á móti. Nú hafa skólarnir hins vegar sent frá sér sameiginlega yfirlýsingu þar sem árás á frelsi skólanna er mótmælt.

Kristján segist mest megnis hafa einbeitt sér að náminu þegar alda mótmæla gegn aðgerðum Ísrael reis sem hæst á háskólasvæðum Bandaríkjanna síðastliðið haust. Hann segir hins vegar að ekki hafi verið hjá því komist að fylgjast með þegar lætin voru sem mest síðasta vor. Trump hefur sagt gyðingaandúð hafa viðgengist á háskólasvæðinu. Kristján kannast þó ekki við það.

Frétt af mbl.is

Harvard fer í mál við Trump-stjórnina

Lítið verið í umræðunni 

„Það var mikill hiti á svæðinu. Nemendur voru að tjalda á háskólasvæðinu til að vekja athygli á málinu. Harvard hefur gert ágætlega síðan þetta var og veitt nemendum ákveðin svæði til að mótmæla eða að tala um hlutina. Ég hef ekki orðið var við mikinn klofning í skólanum og þetta hefur lítið verið í umræðunni upp á síðkastið, eða þar til Trump fór að benda á þetta og að nýta mótmælin sem rök til að fara gegn Harvard,“ segir Kristján.

Frétt af mbl.is

Trump hótar Harvard-háskóla

Hef reynt að styðja minn innsta hring

Hann segir þó að alþjóðlegir nemendur hafi undanfarna daga mótmælt aðgerðum Trumps gegn skólanum.

„Það hafa verið hópmótmæli þar sem fólk óttast framtíð sína. Ég hef ekki beint tekið þátt í þessu en er á svæðinu og verð vitni að því sem er að gerast. Ég hef hins vegar tekið þátt í umræðunni enda eru margir félaga minna í óvissu um það hvort þeir fái að vinna eða fái að útskrifast. Ég hef helst verið að styðja minn innsta hring,“ segir Kristján.

Útskrift mögulega í hættu 

Hann segir að aðgerðir Trump-stjórnarinnar hafi ekki bein áhrif á hans plön að öðru leyti en því að hann veit ekki hvort hann muni fá að útskrifast.

„Það verður bara að koma í ljós,“ segir Kristján æðrulaus.

„Vissulega er léttir fyrir mig að vita til þess að starfið á Íslandi sé ekki í hættu. Þetta er erfiðast fyrir fólk sem býr ekki við jafn mikla velmegun og við Íslendingar. Það er fólk sem hefur litið til Bandaríkjanna sem tækifæri til betra lífs,“ segir Kristján.

Yfirvöld með lista yfir nemendur 

Kristján segir að sumir vinir hans hafi óskað eftir því að þjóðerni þeirra verði ekki gefið upp í viðtalinu. Er það táknrænt fyrir þann ótta sem nemendur upplifa enda eru dæmi um að nemendum og mótmælendum hafi verið vísað úr landi af engu eða litlu tilefni.

„Yfirvöld hafa verið að reyna komast yfir ákveðna lista af nemendum sem hafa verið á móti stefnu eða gildum Trump,“ segir Kristján.

Upplifir enga gyðingaandúð 

Hefurðu orðið var við einhverja gyðingaandúð eða að gerð hafi verið hróp eða köll á fólk af þeim uppruna? 

„Maður hefur ekki orðið var við ofbeldi eða hatur gagnvart gyðingum. En fólk hefur verið ósátt við ástandið í Palestínu og það hefur ábyggilega ekki verið þægilegt að vera frá Ísrael eða af þessum uppruna þegar hitinn var hvað mestur. Ég get ekki sagt að ég hafi séð neitt sem hægt væri að túlka gyðingaandúð í nærumhverfinu. En það er bara hér og maður hefur heyrt sögur af mun grófari framkomu gagnvart gyðingum annars staðar. Mótmælin hérna í Harvard hafa helst beinst að sársaukanum sem er í gangi á Gasa. Það er mín upplifun,“ segir Kristján. 

• Blogga um frétt