Innlent | mbl | 29.4.2025 | 16:30 | Uppfært 30.4.2025 12:07

Ólíklegt að undirskriftarlisti hafi áhrif

Ljósmynd/Aðsend

Skjólstæðingar Janusar endurhæfingar afhentu Ölmu Möller heilbrigðisráðherra undirskriftalista gegn lokun úrræðisins í gær.

Spurð hvort listinn hafi áhrif á ákvörðunina um að loka Janusi segir Alma:

„Þetta mál er bara svo langt komið, það var skrifað undir samningslok 8. nóvember.“

Alma tók við ráðuneytinu þegar samningurinn hafði þegar verið undirritaður en henni þótti mikilvægt að taka „einn snúning“ á málinu og athuga hvort að starfsemin gæti átt heima undir hatti Reykjalundar en um það náðist ekki samkomulag.

„Síðan hefur verið unnið af kappi að því að finna úrræði fyrir þá aðila sem eru í þjónustu hjá Janusi. VIRK hefur haft forystu um það, enda eru þeir með gögn um hverjir eru þarna í þjónustu og hafa verið með 75% af þessum tilraunasamningi sem nú er að enda.“

Frétt af mbl.is

Segjast munu tryggja endurhæfingu við hæfi

VIRK hafi ákveðið að framlengja ekki samninginn

„Það hafa verið haldnir fundir og þeim sem eru í þjónustu hefur verið boðið til fundar. Eftir því sem ég kemst næst er búið að finna önnur úrræði fyrir þessa einstaklinga,“ segir heilbrigðisráðherrann.

Spurð hvort þau úrræði verði á vegum VIRK segir hún það fara eftir því hverju hver og einn þurfi á að halda.

„Ég held að mikill meirihluti verði áfram hjá VIRK, en VIRK mun semja við fleiri aðila um að taka utan um þennan hóp. Svo eru 10 eða 11 einstaklingar sem eru metnir þurfa meiri geðheilbrigðisþjónustu og þeir munu fá meðferð hjá göngudeild lyndisraskana á Kleppi og þar er líka virkniúrræði,“ segir Alma.

Þá bætir hún við að það hafi verið mat endurhæfingarráðs að þessir einstaklingar þyrftu virkni og starfsendurhæfingu, það sé ástæðan fyrir því að VIRK væri með 75% af þessum tilraunasamningi sem gerður var árið 2023, til tveggja ára, á milli VIRK, Sjúkratrygginga Íslands og Janusar. Hlutur SÍ var 25% á móti 75% hlutar VIRK.

„Það var VIRK sem ákvað að framlengja ekki þennan tilraunasamning, og það varð ljóst um sumarið í fyrra.“

Frétt af mbl.is

Janus bjargaði lífi Írisar

Rætt um stofnun einhverfuseturs

„Margir af þessum einstaklingum eru með einhverfu. Einhverfa er ekki sjúkdómur heldur fötlun og þessum hópi er hætt við ýmsum geðröskunum. Það er alveg ljóst að það þarf að styrkja þjónustu við þennan hóp,“ segir Alma.

„Það kom út skýrsla í nóvember sem heitir Hvert á ég að leita, en hópurinn á erfitt með að finna sínar leiðir. Það hefur verið rætt um að stofna svokallað einhverfusetur og ég hef tekið það upp við félags- og húsnæðisráðherra.“

Þá bætir hún við að unnið sé einnig að skýrslu um þjónustu við einhverfa í félags- og húsnæðisráðuneytinu og þegar sú skýrsla liggi fyrir hafi hún óskað eftir að „stilla saman strengi um framhaldið“.