„Gigg-hagkerfð“ atlaga að siðuðu samfélagi

Í tilefni 1. maí birti Finnbjörn Hermannsson, formaður Alþýðusambands Íslands, skriflegt ávarp. Þar fer hann hörðum orðum um markaðsvæðingu í orkumálum og stöðu launafólks í íslensku samfélagi. Yfirskrift ávarpsins er: „Við sköpum verðmætin.“

„Verkalýðshreyfingin hefur verið mikilvægasta afl framfara og breytinga í landinu. Þeirri sögu er sjálfsagt að halda á lofti, ekki síst gagnvart yngri kynslóðinni, sem tekur þeim réttindum og velferð sem áunnist hefur sem sjálfgefnum hlut,“ skrifar hann.

Finnbjörn skrifar í ávarpið í blaði sem ASÍ gaf út í tilefni dagsins, Vinnan.

Varar við fjölgun verktakastarfa

Í greininni leggur Finnbjörn ríka áherslu á að það sé vinnandi fólk sem standi undir verðmætasköpun í samfélaginu og kallaði eftir uppgjöri við aðgerðir stjórnvalda í Covid-faraldrinum.

„Víða hefur slík skoðun leitt í ljós viðurkenningu á því að stjórnvöld hafi farið offari í efnahagslegum viðbrögðum sínum og valdið þannig ómetanlegum skaða.“

Í ávarpinu er dregin upp gagnrýnin mynd af þróun á vinnumarkaði. Hann varar sérstaklega við fjölgun verktakastarfa og ótryggra starfa, svokallaðra gigg-starfa, sem hann segir grafa undan réttindum launafólks.

Þessi þróun sé hluti af stærra mynstri þar sem markaðsöflin þrengi að velferðarkerfinu og réttindum almennings.

„Gigg-hagkerfið er atlaga auðhyggjunnar að siðuðu samfélagi. Markmið þessarar grímulausu niðurrifsstefnu er að brjóta á bak aftur samfélagsgildin og þar með réttindin og mannlega reisn til að arðsemiskröfur fjármagnsafla gangi óhindraðar fram,“ skrifar Finnbjörn.

Sérhagsmunaöfl ásælist orku, land, vatn og vind

Formaðurinn beindi einnig sjónum að þróun í orkumálum og gagnrýnir harðlega markaðsvæðingu raforkukerfisins. Hann vísar til nýlegrar skýrslu verðlagseftirlits ASÍ sem sýnir verulegar hækkanir á raforkuverði, allt að 37 prósent á kílóvattstund hjá sumum.

„Sterk sérhagsmunaöfl hér á landi ásælast orkuna, landið, vatnið, vindinn, jarðvarmann. Við eigum eftir að sjá harðnandi átök um þessar auðlindir þjóðarinnar í náinni framtíð og mikilvægt er að verkalýðshreyfingin og önnur samtök um almannaheill haldi vöku sinni og standi saman í þeirri baráttu,“ skrifar hann.

Í lok ávarpsins minnti Finnbjörn á sögulega baráttu verkalýðshreyfingarinnar fyrir bættum kjörum og réttlæti, og hvatti til samstöðu og skýrari sýnar í baráttunni fram undan.

• 1 blogg um fréttina

Bloggað um fréttina

• Jón Bjarnason: 1. Maí - Baráttan um fullveldi og auðlindir