Truflar ekki stjórnarsetuna

„Það truflar [stjórnarsetu mína] ekki, ekki frekar en önnur störf annarra stjórnarmanna á öðrum vettvangi,“ segir Heimir í samtali við Morgunblaðið og bendir á að allir stjórnarmenn Ríkisútvarpsins séu með pólitíska skipan.

Síðan Heimir hóf störf hjá Flokki fólksins í febrúar hefur hann gagnrýnt fjölmiðla og fréttaflutning þeirra sem viðkemur flokknum. Setti hann meðal annars fram harðorða gagnrýni á Facebook-síðu sinni um fréttastofu RÚV og einstaka starfsmenn hennar í kringum afsögn Ásthildar Lóu Þórsdóttur sem barnamálaráðherra. Þá hefur Heimir ítrekað lagt orð í belg og gert athugasemdir þegar blaðamenn ræða við ráðherra Flokks fólksins.

Heimir telur slíka gagnrýni og vinnubrögð ekki ganga gegn hagsmunum Ríkisútvarpsins.

„Það er ekkert sem segir að stjórnarmaður í stjórn RÚV geti ekki verið gagnrýninn á fréttaflutning RÚV og á starfsemi RÚV. Stjórnarmenn í RÚV eru einmitt þar til að vakta starfsemi félagsins,“ segir Heimir og bætir við:

„Fréttastofa Ríkisútvarpsins er sjálfstæð fréttastofa og stjórn Ríkisútvarpsins hefur engin afskipti af stjórn fréttastofu.“

En er þá eðlilegt að stjórnarmaður gagnrýni störf fréttastofunnar og einstakra starfsmanna hennar opinberlega?

„Já, ef þeir hafa unnið fyrir því þá er það alveg sjálfsagt að stjórnarmaður í RÚV geri það.“