Halla heldur til Svíþjóðar

Forseti Íslands, Halla Tómasdóttir, og Björn Skúlason, eiginmaður hennar, hefja þriggja daga ríkisheimsókn sína til Svíþjóðar á morgun. 

Þorgerður Katrín Gunnarsdóttir utanríkisráðherra og Alma Möller heilbrigðisráðherra taka einnig þátt í dagskrá heimsóknarinnar ásamt opinberri sendinefnd og fulltrúum viðskipta- og menningarlífs. Þetta kemur fram í tilkynningu frá forsetaembættinu. 

Það eru Karl XVI. Gústaf konungur og Silvía drottning sem bjóða til þessarar heimsóknar og er markmið hennar að styrkja tengsl landanna og vinna að frekara samstarfi, svo sem á sviði heilbrigðismála, sjónvarps- og kvikmyndagerðar og öryggismála.

Fulltrúar 30 íslenskra fyrirtækja taka þátt

Samhliða ríkisheimsókninni fer viðskiptasendinefnd, leidd af Íslandsstofu, til Svíþjóðar með fulltrúum 30 íslenskra fyrirtækja með áherslu á líftækni, nýsköpun og fjárfestingar.

Í tilefni heimsóknarinnar fer einnig sendinefnd á sviði sjónvarps- og kvikmyndagerðar og tekur þátt í dagskrá sem skipulögð er í samstarfi Swedish institute og sænska utanríkisráðuneytisins við Kvikmyndamiðstöð Íslands og Film in Iceland.

Dagskráin stendur til fimmtudags og hefst með formlegri móttökuathöfn við Konungshöllina í Stokkhólmi en að henni lokinni á forseti fund með forseta löggjafarþingsins, Andreas Norlén.

• 1 blogg um fréttina

Bloggað um fréttina

• Jóhannes Ragnarsson: Litaforsetar nútímans á Íslandi og í Bandaríkjunum