Innlent | mbl | 6.5.2025 | 13:12 | Uppfært 15:03

Á fylleríi í Kringlunni um miðjan dag á virkum degi

Rúna Ágústsdóttir, áfengis- og vímuefnaráðgjafi hjá Foreldrahúsi, lítur það alvarlegum augum að börn og ungmenni sækist í að stytta sér stundir eftir að hefðbundnum skólatíma lýkur í verslunarmiðstöðvum og á öðrum fjölförnum stöðum. Þar geti margt misjafnt átt sér stað.

„Þau eru mest að nota á daginn oft, sérstaklega á virkum dögum,“ segir Rúna og brýnir fyrir foreldrum að þekkja hættumerki sem gjarnan fylgja vímuefnaneyslu ungmenna.

„Þau eru þá í Kringlunni, í Smáralind, í Skeifunni og Mjóddinni. Þau eru mikið í Skeifunni, þar sem ég vinn, þau eru mikið að hanga þar. Þetta er kallað svona „meeting place“ fyrir unglinga. Þú getur keypt þar, þú getur selt þar, þú getur hitt fólk þar og hitt vini þína. Þetta eru svona staðir þar sem það eru einhverjar búðir og eitthvað að gera og svona.“

Algengt er að unglingadrykkja fari fram um miðjan dag á virkum degi. Samsett mynd/Unsplash/Etienne Girardet/Kira

Lausagangur unglinga hættumerki

Að sögn Rúnu fer neysla ungmenna síður en svo einungis fram á kvöldin og um helgar. Hefur reynsla hennar til fjögurra áratuga sýnt fram á algengi þess að unglingadrykkja og önnur vímuefnaneysla fari alla jafna fram um miðjan dag á virkum dögum. Þar með geri grunleysi foreldra og forráðamanna gjarnan vart við sig á meðan útivistartímar og aðrar reglur eru virtar.

Frétt af mbl.is

Heimsendingarþjónusta á fíkniefnum fljótari en á pítsu

„Ég meina þau eru í Kringlunni og þau eru að drekka þar. Bara á fylleríi fyrir utan klósettin,“ segir Rúna. „Stundum er það þannig að foreldrarnir eru alveg grunlausir.“

En hvað á 14 ára „venjulegt“ barn að vera að gera á daginn?

„14 ára barn á að vera í sínu eigin póstnúmeri. Þau eiga ekki að eiga vini í Hafnarfirði, uppi á Akranesi og vera bara í strætó og úti um allt,“ segir Rúna.

„Lausagangur unglinga er oft hættumerki. Þau eiga að vera í hverfinu sínu og eiga helst að stunda eitthvað.“

Smelltu á hlekkinn hér að neðan til að horfa eða hlusta á viðtalið við Rúnu í heild sinni.