Hópur skoðar framtíðarútfærslu Flóttamannavegar

Hópur til að skoða framtíðarútfærslu á svokölluðum Flóttamannavegi var stofnaður í mars, en þau þrjú sveitarfélög sem vegurinn liggur í gegnum hafa haft mismunandi sýn á legu og hlutverk vegarins. Þetta er meðal þess sem kemur fram í svari Eyjólfs Ármannssonar innviðaráðherra við fyrirspurn Árna Rúnars Þorvaldssonar, varaþingmanns Samfylkingarinnar, um veginn.

Í svarinu segir Eyjólfur að Vegagerðin sé veghaldari á þeim hluta Elliðavatnsvegar/Flóttamannavegar sem liggur frá Kaldársvegi að Vífilsstaðarvegi en Kaldárselsvegur sé í veghaldi Hafnarfjarðarbæjar og Vífilsstaðavegur í veghaldi Garðabæjar.

Eyjólfur segir að Elliðavatnsvegur sé því ekki hluti af samhangandi stofnvegakerfi þjóðvega á höfuðborgarsvæðinu.

Árni Rúnar spurði ráðherrann hvort liggi fyrir ákvörðun um það að hálfu Vegagerðarinnar að hætt verði að skilgreina Elliðavatnsveg/Flóttamannaveg sem skilaveg. Árni spurði að ef svo er ekki standi það þá til að endurskoða stöðu hans sem skilavegar að hálfu Vegagerðarinnar.

Ekki hægt að skila honum til sveitarfélaganna

„Í tengslum við breytingu á vegalögum árið 2007 féll Elliðavatnsvegur ekki lengur undir skilgreiningu á stofnvegum á höfuðborgarsvæðinu. Ástand Elliðavatnsvegar frá Kaldárselsvegi að Vífilsstaðavegi var með þeim hætti að ekki var unnt að skila honum til sveitarfélaganna,“ segir í svari ráðherrans.

Hann segir að tillögu að þingsályktun um samgönguáætlun fyrir árin 2024–2038 sem ekki var afgreidd á Alþingi hafi verið gert ráð fyrir fjármagni til endurbóta á Elliðavatnsvegi með það að markmiði að viðkomandi sveitarfélög gætu tekið við veghaldi Elliðavatnsvegar.

Eyjólfur segir í svarinu að á undanförnum árum hafi ekki legið fyrir sameiginleg sýn þeirra þriggja sveitarfélaga sem Elliðavatnsvegur tengir saman varðandi legu og hlutverk vegarins. Vegagerðin hafi hins vegar átt í samtali með Kópavogsbæ, Garðabæ og Hafnarfirði og á fundi í mars 2025 hafi verið stofnaður vinnuhópur þessara aðila sem hafi það hlutverk að skoða framtíðarútfærslu Elliðavatnsvegar og hvort og hvernig hann gæti talist hluti af stofnvegakerfi höfuðborgarsvæðisins.

Umferð um veginn aukist jafnt og þétt

„Með aukinni umferð á höfuðborgarsvæðinu ásamt stækkun byggðar við Elliðavatnsveg í Hafnarfirði, Garðabæ og í efri byggðum Kópavogs hefur umferð um veginn aukist jafnt og þétt og í dag er ástand vegarins og umferðaröryggi ekki ásættanlegt,“ segir enn fremur í svari Eyjólfs Ármannssonar.

Hann segir að Vegagerðin hafi lagt áherslu á að sveitarfélögin sem vegurinn tengir saman séu sammála um hlutverk og útfærslur ef hann á að verða hluti af stofnvegum á höfuðborgarsvæðinu.

Bætt umferðaröryggi við Urriðaholt

Árni spurði ráðherrann enn fremur hvort liggi fyrir áætlanir að af hálfu Vegagerðarinnar um uppbyggingu ofanbyggðavegar þar sem nú liggur Elliðavatnsvegur/Flóttamannavegur.

Í svari ráðherrans kom fram að ekki liggi fyrir áætlanir um uppbyggingu vegarins að undanskildum athugunum á bættu umferðaröryggi við Urriðaholt með vegamótum og undirgöngum fyrir gangandi vegfarendur.

„Vegagerðin gerir ráð fyrir að frekari áætlanir verði gerðar í kjölfar niðurstöðu vinnuhóps Vegagerðarinnar og sveitarfélaganna og að þær geti legið til grundvallar þegar kemur til endurskoðunar samgönguáætlunar sem gert er ráð fyrir að verði lögð fram á Alþingi haustið 2025,“ segir Eyjólfur.

Vegurinn er barn síns tíma og er bugðóttur og hæðóttur.

Mikil umferð er um veginn, sérstaklega í seinni tíð. Hann liggður að vinsælum útivistarsvæðum, svo sem Heiðmörk og golfvöllum, og byggð nálægt honum hefur stóraukist á undanförnum árum.

Veginn lagði bandaríska varnarliðið á árum seinni heimsstyrjaldarinnar, 1942. Vegurinn, eða hlutar hans, hefur gengið undir ýmsum nöfnum í gegnum tíðina, svo sem Setuliðsvegur, Flóttamannaleið, Flóttavegur, Flóttamannavegur, Vatnsendavegur og Ofanbyggðavegur. Ekki mun hann þó hafa verið lagður svo herliðið gæti farið um hann á flótta.

• Blogga um frétt