Innlent | mbl | 8.5.2025 | 17:59 | Uppfært 18:15

Velsæld mikilvægari en aðgerðir í loftslagsmálum

Velsældarþing í Hörpu í dag. mbl.is/Karítas

Samkvæmt nýrri íslenskri kynslóðamælingu kemur fram að Íslendingar telja heilsu og vellíðan mikilvægari en aðgerðir í loftslagsmálum. Ungt fólk vill aukna velsæld samkvæmt niðurstöðum könnunarinnar sem voru birtar á Velsældarþingi í Hörpu.

Dóra Guðrún Guðmundsdóttir, sviðstjóri lýðheilsu hjá Embætti landlæknis og fundarstjóri Velsældarþingsins, kynnti niðurstöður úr nýrri íslenskri kynslóðamælingu á Velsældarþingi í Hörpu í morgun. Könnunin var unnin af Prósent.

Heilsa og vellíðan mikilvægasta heimsmarkmiðið

Niðurstöðurnar benda til þess að Íslendingar telji heilsu og vellíðan, frið og réttlæti og jöfnuð mikilvægustu heimsmarkmið Sameinuðu þjóðanna til að fylgja eftir í íslensku samfélagi. Heimsmarkmið Sameinuðu þjóðanna eru 17 markmið sem miða að því að bæta samfélög, vernda jörðina og tryggja frið og velsæld fyrir alla fyrir árið 2030.

Í könnunni voru þátttakendur beðnir um að velja þau heimsmarkmið Sameinuðu þjóðanna sem þeir telja mikilvægast að leggja áherslu á í íslensku samfélagi. Niðurstöðurnar sýna fram á það að heilsa og vellíðan sé mikilvægasta heimsmarkmiðið og má sjá mun á viðhorfum meðal kynslóða.

Samkvæmt niðurstöðum könnunarinnar segja 48% Z-kynslóðarinnar að heilsa og vellíðan sé mikilvægasta heimsmarkmiðið. Z-kynslóðin samanstendur af þeim sem fæddir eru á árunum 1997-2010.

Aðgerðir í loftslagsmálum mikilvægastar 2021

Árið 2021 voru aðgerðir í loftslagsmálum það heimsmarkmið sem flest sem tilheyra Z-kynslóðinni töldu mikilvægast eða um 59%. Tveimur árum síðar urðu miklar breytingar en þá var heimsmarkmiðið heilsa og vellíðan oftast valið og aðgerðir í loftslagsmálum féllu þá í fjórða sæti.

Öllum kynslóðum nema uppgangskynslóðinni fannst heilsa og vellíðan vera mikilvægasta markmiðið. Uppgangskynslóðin sem samanstendur af þeim sem fæddir eru á árunum 1946-1964, taldi frið og réttlæti vera mikilvægasta heimsmarkmiðið. Allar kynslóðirnar áttu það sameiginlegt árið 2021 að aðgerðir í loftslagsmálum væru mikilvægastar. Nú telja flestir slíkar aðgerðir ekki vera jafn mikilvægar.

Þetta var í þriðja sinn sem kynslóðamælingin var framkvæmd og svöruðu 2.500 manns könnuninni.