Skólahúsnæðið entist aðeins í 22 ár

Upphaflega var talið nægjanlegt að endurnýja gluggakerfið, laga þakið og bæta hljóðvistina. Á seinni stigum kom sú ósk frá skóla- og frístundasviði að nýta tækifærið og uppfæra innra skipulag hússins í samræmi við kröfur nútímalegrar kennslu. Að ábendingum ráðsins voru hannaðar rúmbetri heimastofur fyrir hvern hóp, með hópaherbergjum á milli heimastofa, stærri náttúrufræðistofu og sérvinnuherbergi fyrir kennara.

Flata þakið byggt upp

Skipt verður um álgluggakerfi og húsið einangrað og klætt að utan til að komast fyrir kuldabrú sem hefur leitt til raka. Flata þakið verður byggt upp með nýjum þakhalla til að minnka hættu á leka. Ný loftræsisamstæða með varmaendurvinnslu verður sett upp. Hljóðvist og aðgengismál verða í samræmi við ýtrustu nútímakröfur. Hljóðvist í húsinu var ófullnægjandi og það vantaði lyftu í nýrri hluta hússins. Endurgerðin verður svansvottuð, sem á að tryggja að innivist í húsinu verði eins og best verður á kosið, bæði hvað varðar heilsu nemenda og starfsfólks, húsið verði vistvænna og orkunýtni betri.

15 milljarðar í viðhald

Verkefnið er hluti af viðhaldsátaki borgarinnar á skólahúsnæði en Hólabrekkuskóli er á meðal þeirra skólabygginga sem eru í fyrsta forgangi. Borgin hefur tryggt fjármögnun frá Þróunarbanka Evrópuráðsins (CEB) fyrir 100 milljónir evra, eða sem nemur um 15 milljörðum íslenskra króna.

Upprunalegur arkitekt hússins er Gylfi Guðjónsson og félagar ehf. Sú teiknistofa heitir nú Teikna – Teiknistofa arkitekta og er Jóhann Einar Jónsson arkitekt skráður aðalhönnuður við endurgerð hússins. Verktakinn sem annast framkvæmdirnar er Tindhagur ehf.