Innlent | Morgunblaðið | 10.5.2025 | 22:44

Húseiganda synjað um bílastæði á lóð

Hér má sjá eitt af fjölmörgum bílastæðum sem eru við götuna. mbl.is

Eigendur húss við Fjólugötu í Reykjavík hafa fengið synjun við þeirri ósk að fá að útbúa bílastæði á lóð sinni.

Skipulagsfulltrúi borgarinnar hafði tekið neikvætt í erindið og skaut húseigandinn þeirri ákvörðun til umhverfis- og skipulagsráðs borgarinnar.

Á fundi ráðsins 30. apríl sl. var niðurstaða skipulagsfulltrúa staðfest með fjórum atkvæðum fulltrúa Samfylkingar, Pírata, Sósíalista og Flokks fólksins gegn tveimur atkvæðum Sjálfstæðisflokksins og einu atkvæði Framsóknarflokksins.

Fulltrúar Sjálfstæðisflokksins töldu í bókun rétt að heimila viðkomandi húseigendum að leggja bifreiðastæði á lóð sinni, líkt og fjölmörg fordæmi eru fyrir í götunni og öðrum nærliggjandi götum.

Fulltrúi Framsóknarflokksins benti á í bókun að afgreiðsla ráðsins á málskotinu skorti rökstuðning. Tæplega væri hægt að vísa í venjur um að banna gerð bílastæða inni á einkalóð út frá þeim rökum að bílar þyrftu að aka yfir gangstéttir til komast í eða úr stæðum. Það fyrirkomulag að bílar ækju í og úr stæðum yfir skilgreindar gangstéttir fyrirfyndist um alla borg. Það virkaði handahófskennt að hafna beiðni íbúanna á Fjólugötu út frá þeim rökum.

Fram kemur í gögnum sem húseigendur sendu inn að umrætt hús sé það elsta við götuna og það eina sem ekki er með bílastæði. Fjólugata liggur milli Skothúsvegar og Njarðargötu, skammt frá Tjörninni.

Í umsögn verkefnastjóra skipulagsfulltrúa vegna málsins kemur fram að í aðalskipulagi Reykjavíkur 2040 sé fjallað um hverfisvernd innan Hringbrautar.

Þar komi fram eftirfarandi. „Ekki skal raska hinu sögulega gatnaskipulagi, skipan byggingarreita og opinna rýma né lóðaskipan. Ef breyta á grunnmynstri byggðarinnar og sögulegu skipulagi skal færa fyrir því sterk rök í tillögu að deiliskipulagi og/eða hverfisskipulagi og gera grein fyrir því hvernig það samræmist markmiðum borgarverndarstefnu og með hvaða hætti ný byggð bætir þá byggð sem fyrir er.“

Keyrt yfir gangstétt

Verkefnastjórinn segir að ný stæði á lóðinni krefðust þess að nýjar innkeyrslur yrðu gerðar frá götu. „Almennt er ekki tekið jákvætt í að gera ný bílastæði á lóð í gróinni byggð þar sem reynt er eftir fremsta megni að koma í veg fyrir að keyrt sé yfir gangstétt til að tryggja umferðaröryggi. Einnig yrði við gerð bílastæðisins að fjarlægja gróður sem er áberandi hluti af götumyndinni og yfirbragði byggðarinnar,“ segir í umsögninni.

Loks segir verkefnastjórinn að þó nokkur dæmi séu um innkeyrslur og bílastæði á lóð eins og fyrirspyrjandi nefnir í bréfi sínu. Í einhverjum tilfellum getur verið um óleyfisframkvæmdir að ræða.

„Í öðrum tilfellum hafa verið samþykkt bílastæði á lóð. Innkeyrslur af þessum toga eru þó ekki taldar fordæmisgefandi fyrir því að heimila bílastæði með tilheyrandi raski á gangstétt við Fjólugötu,“ segir verkefnastjórinn.