Innlent | mbl | 15.5.2025 | 11:57

Um 1.700 skjálftar hafa mælst

Hátt í 1,700 jarðskjálftar hafa mælst í hrinunni sem hófst í fyrradag. mbl.is/Anton Guðjónsson

Ekkert lát er á skjálftahrinunni sem hófst í grennd við Grímsey í fyrradag og hafa mælst um 1.700 skjálftar frá því að hrinan hófst.

Stærsti skjálftinn í hrinunni varð í gærmorgun sem var 5 að stærð og rétt fyrir miðnætti í gær mældist skjálfti af stærðinni 3,8. Fjölmargir skjálftar hafa mælst það sem af er degi, sá stærsti 3 að stærð rétt fyrir klukkan 10 í morgun.

Frétt af mbl.is

Enn skelfur Grímsey

„Þessi hrina er enn í fullum gangi og skjálftarnir koma í bylgjum. Frá því klukkan 6 í morgun hafa verið að mælast nokkrir skjálftar á milli 2-3 að stærð,“ segir Steinunn Helgadóttir, náttúruvársérfræðingur á Veðurstofu Íslands, í samtali við mbl.is.

Þorvaldur Þórðarson, prófessor í eldfjallafræði, sagði í samtali við mbl.is á þriðjudaginn að ekki væri hægt að útiloka kvikuhreyfingar á þessu svæði.

Frétt af mbl.is

Þverbrotabelti lengir skjálfta við Grímsey

Steinunn segir að líklegast sé um sniðgengishreyfingar á jarðskorpunni að ræða. Hún segir skjálftahrinur séu frekar algengar á þessu svæði og það geti alveg komið skjálftar upp á 6 að stærð en Grímsey liggur á þverbrotabelti. Virkin er að mestu bundin við svæði rétt austan við Grímsey.

„Við höfum fengið margar tilkynningar frá fólki í Grímsey, á Akureyri og á Dalvík sem hafa fundið vel fyrir skjálftunum,“ segir hún.