Guðmundur Ingi Kristinsson, mennta- og barnamálaráðherra, gaf mbl.is rangar upplýsingar í dag fyrir mistök þegar hann var spurður út í stöðu á meðferðarúrræðum fyrir börn með fjölþættan vanda.

Ráðherra sagði að fyrra bragði að asbest hefði fundist í Blönduhlíð í Mosfellsbæ, þar sem til stendur að opna stuðningsheimili fyrir börn og unglinga á næstu mánuðum, á vegum Barna- og fjölskyldustofu.

Þegar ráðherra var svo spurður aftur, til að ítreka að upplýsingarnar væru réttar, hvort asbest hefði verið vandamál í Blönduhlíð í Mosfellsbæ, játti hann því. Þær upplýsingar komu svo fram í frétt sem birtist á mbl.is fyrr í kvöld.

Hið rétta er að asbest fannst í Gunnarsholti á Rangárvöllum þar sem til stendur að opna aftur meðferðarheimilið Lækjarbakka í haust. Guðbjörg Ingunn Magnúsdóttir, aðstoðarmaður ráðherra, hafði samband við mbl.is í kvöld til að leiðrétta þessi mistök ráðherra.

Ráðherra segir framkvæmdir á áætlun

Lækjarbakka var lokað í apríl í fyrra þegar í ljós kom mygla í húsnæðinu sem það var í áður. Um er að ræða meðferðarheimili fyrir drengi með fjölþættan vanda sem þurfa á langtímameðferð að halda, en ekkert slíkt meðferðarúrræði hefur verið í boði í rúmt ár.

Guðmundur Ingi sagði í samtali við mbl.is í dag að unnið væri að því að hreinsa asbest úr hús­næðinu og gera nauðsyn­leg­ar breyt­ing­ar svo það stæðist all­ar ör­yggis­kröf­ur. Asbest var gjarn­an notað sem ein­angr­un í hús­um á ár­un­um 1950 til 1980, en notk­un þess hef­ur verið bönnuð og er það hættu­legt heilsu manna.

„Það er verið að taka allt í gegn og þar er allt á áætl­un. Það eru upp á bruna­varn­ir og annað að gera sem við þurf­um að fylgj­ast vel með, að það sé allt hundrað pró­sent,“ sagði Guðmund­ur Ingi í dag.

Samkvæmt svari Barna- og fjölskyldustofu við skriflegri fyrirspurn mbl.is í síðustu viku, er verkið í útboðsferli og samkvæmt verkáætlun er gert ráð fyrir að framkvæmdum ljúki í september.

Tengdar fréttir

Neyðarástand í málefnum barna

„Það er ekki hægt að þessi börn bíði svona“

• Skoða ekki útlönd þrátt fyrir úrræðaleysi
• Barn brýtur niður hurðir: Talið að þær myndu halda
• „Hann drekkur þangað til líkaminn slekkur á sér“
• Smyglaði barni inn á Stuðla: „Mjög alvarlegt“

» Fleiri tengdar fréttir

• Blogga um frétt