Mikil stemning þegar VÆB bræður mættu í Breiðholtsskóla

„Það er frábær stemning. Bara blómstrandi gleði,“ segir Ásta Birna Björnsdóttir formaður foreldrafélags Breiðholtsskóla. Um 400 nemendur og foreldrar héldu vorhátíð í skólanum í gær.

Skólahljómsveit Árbæjar og Breiðholts spilaði og hoppukastalar voru á staðnum. Sirkus Íslands sýndi listir sínar og VÆB bræður tróðu upp, en dagskrá stóð frá 16 til 18.

Veðrinu var ekki leyft að spilla fjörinu. „Við hefðum pantað veðrið sem var í gær [miðvikudag] en maður gerir gott úr öllu,“ segir Ásta.

„Það var óskandi að hafa sól á lofti en við erum bara með sól í hjarta," bætir hún við en ákveðið var að færa sirkus atriðin og VÆB bræður inn þegar ljóst var að það myndi rigna.