Fylgið í sögulegri lægð og mikil vinna fram undan

Lilja Alfreðsdóttir, varaformaður Framsóknar, segir að Framsóknarflokkurinn þurfi að fara aftur í grunngildin í kjölfar þess að flokkurinn mældist með sitt minnsta fylgi frá upphafi mælingar. Hún furðar sig á því að eitt af helstu stefnumálum flokksins hafi setið á hakanum í síðustu kosningabaráttu.

Þetta segir hún í samtali við mbl.is en á mánudaginn birti Gallup könnun þar sem flokkurinn mældist með 5,5% fylgi.

„Framsókn þarf að fara aftur í grunngildin, standa með heimilunum í landinu, skoða hvað er hægt að gera betur og fara í alvöru samtal við þjóðina,“ segir hún.

Frétt af mbl.is

Samfylkingin mælist yfir 30 prósentum

„Af hverju fór hann frá grunnstefnumáli“

Framsóknarflokkurinn galt afhroð í kosningunum síðasta vetur, fékk 7,8% atkvæða og tapaði átta þingmönnum á milli kosninga. Lilja segir flokkinn þurfa skýrari sýn og fara betur yfir hvað hafi farið úrskeiðis í síðustu kosningum.

„Af hverju fór hann frá grunnstefnumáli eins og því að það væri hægt að nota séreignasparnaðinn til að auðvelda fyrir um húsnæðiskaup? Þarna fór flokkurinn frá því sem var samþykkt á flokksþingi,“ segir Lilja og bætir við:

„Það þarf aftur að ná þessu talsambandi við kjósendur, einblína á verðmætasköpun og heimilin, og það þarf skýra sýn og dugnað til þess að ná fylginu aftur upp.“

Mikilvæg vinna fram undan

Í skoðana­könn­un sem fram­kvæmd var af Maskínu í maí sögðust 29,3% fram­sókn­ar­manna hlynnt því að sjá Lilju sem næsta leiðtoga flokks­ins. 33,1% svar­enda sögðust styðja Will­um Þórs­son, ný­kjör­inn formann ÍSÍ.

Aftur á móti sögðu aðeins 18,7% svar­enda að þeir vildu sjá Sig­urð Inga Jóhannsson, formann Framsóknar, gegna for­mann­sembætt­inu áfram.

Telur þú Sigurð Inga bera ábyrgð á slöku fylgi flokksins?

„Ég tel að það þurfi að skerpa á stefnumálum flokksins og það hefur ekki komist nægilega vel til skila. Þannig það er mikilvæg vinna fram undan,“ segir Lilja.

Mikil vinna fram undan fyrir forystuna

Flokksþing Framsóknar á að fara fram eigi síður en árið 2026 en sumir Framsóknarmenn hafa viðrað hugmyndir um að flýta flokksþinginu.

Lilja segir aðspurð að slík ákvörðun sé undir miðstjórn flokksins komin, sem fundar næst í haust.

„Það er augljóst að fram undan er mikil vinna fyrir forystu flokksins, fyrir flokksmenn og fyrir alla vegna þess að ég hef þá trú að flokkur sem stendur fyrir samvinnu og aukinni verðmætasköpun, til að bæta hag landsmanna, eigi alltaf erindi,“ segir hún.

Frétt af mbl.is

Til greina kemur að flýta flokksþingi

• 1 blogg um fréttina

Bloggað um fréttina

• Jóhannes Ragnarsson: Ískyggilegt ástand í helsta Fjósi landsins