Innlent | mbl | 12.6.2025 | 10:39

Teknir með 12 kíló af kókaíni

Mikil aukning hefur verið á kókaínvökva sem haldlagður er á flugvellinum. Komið hafa upp tilfelli þar sem honum er smyglað innvortis. Ljósmynd/Lögreglan á Suðurnesjum

Lögreglan á Suðurnesjum rannsakar nú mál tveggja karlmanna sem teknir voru á Keflavíkurflugvelli með sitthvor 6 kílóin af kókaíni í farangri sínum við komuna til landsins í maí. Sæta þeir báðir varðhaldi, en þeir komu frá Frakklandi. Í tilkynningu frá lögreglu segir að talið sé að mennirnir tengist og að unnið sé að því að upplýsa þátt þeirra og annarra sem kunna að tengjast málinu.

Þá er tekið fram að lögreglan á Suðurnesjum merki verulega aukningu í innflutningi fíkniefna til landsins á milli ára. Þannig hafi embættið lagt hald á 35,5 kíló af kókaíni í fyrra, en það sem af er þessu ári hefur verið lagt hald á 42,5 kíló.

Stefnir í metár

mbl.is fjallaði um þessa þróun í innflutningi kókaíns fyrr í þessum mánuði, en þá hafði lögreglan lagt hald á 40,26 kg og því ljóst að tvö kíló hafa bæst við síðan þá.

Frétt af mbl.is

Kókaínmet á Keflavíkurflugvelli

Sagði Jón Halldór Sigurðsson, sem fer fyrir rannsókn á skipulagðri brotastarfsemi hjá lögreglunni á Suðurnesjum, við það tækifæri að það stefndi í metár. „Miðað við þróunina, haldi hún áfram sem er, ættu þetta kannski að vera allavega 60 kíló í lok árs,” sagði Jón Halldór.

Jafnframt hefur verið lagt hald á 9,78 lítra af kókaínvökva á Keflavíkurflugvelli í ár en í fyrra var magnið 3,23 lítrar. Árið 2023 var enginn kókaínvökvi haldlagður á vellinum.

Frétt af mbl.is

Einhversstaðar komast efnin inn í landið

Einnig mikið af kannabisefni og oyxcontin

Sömuleiðis hefur orðið mikil aukning í málum þar sem lögreglan leggur hald á kannabisefni og oxycontin.

Nú þegar tæpir fimm mánuðir eru liðnir af árinu hefur lögreglan lagt hald á 20576 töflur af oxycontini og eftirlíkingum af efninu á Keflavíkurflugvelli. Um er að ræða gífurlega aukningu en árið 2024 lagði lögreglan hald á 7526 töflur og árið 2023 voru töflurnar 10131.

Þá hefur lögreglan á Suðurnesjum lagt hald á 109.648 kg af kannabisefnum á landamærunum það sem af er ári en árið 2024 var heildarmagnið 172.706 kg. Árið 2023 var sú tala 125.230 kg.