Segir kæru Þjóðfrelsis „aumkunarvert uppátæki“

Þórdís Kolbrún Reykfjörð Gylfadóttir fyrrverandi utanríkisráðherra segir kæru samtakanna Þjóðfrelsis vera aumkunarvert uppátæki og að ekki sé hægt að taka samtökin alvarlega. Samtökin kærðu utanríkisráðherra fyrir landráð fyrr í dag.

Þórdís kemur þá vörnum fyrir núverandi utanríkisráðherra, Þorgerði Katrínu Gunnarsdóttur, í skrifum sínum á Facebook. Þar segir Þórdís kæru Þjóðfrelsis vera meðal annars birtingarmynd pólitískra öfga.

Frétt af mbl.is

Samtökin Þjóðfrelsi kæra utanríkisráðherra fyrir landráð

Borgarar standa vörð um lýðveldi og réttarríkið

Arnar Þór Jónsson, fyrr­ver­andi varaþingmaður Sjálf­stæðis­flokks, for­setafram­bjóðandi í síðustu for­seta­kosn­ing­um og formaður Lýðræðis­flokks­ins, sem bauð fram í alþing­is­kosn­ing­um í haust, er lögmaður samtakanna. Hann sendi út tilkynningu Þjóðfrelsis.

Í til­kynningu Þjóðfrelsis seg­ir að með frum­varpi ut­an­rík­is­ráðherra um breyt­ingu á lög­um um Evr­ópska efna­hags­svæðið, svo­kallaða bók­un 35, sem nú sé til umræðu á Alþingi, sé lagt til að Alþingi lög­festi fyr­ir­mæli um al­menn­an for­gang EES-reglna hér á landi, sam­ræm­ist þær ekki öðru al­mennu laga­ákvæði.

Þá segir jafnframt í tilkynningu samtakanna að þegar kjörn­ir full­trú­ar bregðist skyld­um sín­um gagnvart stjórn­ar­skránni beri al­menn­um borg­ur­um að standa vörð um lýðveldið og rétt­ar­ríkið.

Ómerkileg árás

Þórdís segir árásina ómerkilega og vera móðgun við aðrar þjóðir sem hafa upplifað svik eigin borgara í þágu óvina.

„Hin raunverulega árás á lýðveldið okkar felst í þessari sneypuför sem farin er annaðhvort af brjóstumkennanlegum óvitaskap eða fáheyrðri illgirni,“ skrifar Þórdís á Facebook-síðu sína.

Þá enda skrif Þórdísar á orðunum: „Þetta er aumkunarvert uppátæki.“

• 1 blogg um fréttina

Bloggað um fréttina

• Ómar Geirsson: Verðir stjórnarskráarinnar!