Baðlón við Holtsós í skipulagsferli

Verið að meta ólík sjónarmið

Tómas Birgir Magnússon, oddviti Rangárþings eystra, segir aðspurður að byggingaráformin séu til skoðunar og sveitarfélagið muni fara yfir athugasemdir þegar þær liggi fyrir. Hann segir að þótt andstaða hafi verið frá íbúum og umsagnaraðilum sé ferlið til þess að kalla fram ólík sjónarmið og meta þau.

„Þetta er í skipulagsferli og verið er að vinna að umhverfismati og öðru slíku. Ferlið er hugsað til að fá sjónarmið og vinna úr þeim áður en ákvörðun er tekin,“ segir Tómas Birgir. Undirskriftalisti með nöfnum Eyfellinga sem mótmæltu áformunum barst ekki Skipulagsstofnun á sínum tíma, samkvæmt heimildum blaðsins. Tómas segir listann ekki hafa glatast.

„Eftir því sem ég best veit hefur hann skilað sér núna þangað sem hann átti að fara. Auðvitað eru allir mannlegir og eitthvað getur gleymst en þá þarf það að vera leiðrétt og það hefur verið gert, svo ég viti best.“

Hröð uppbygging hótela og gistiaðstöðu í nágrenni Seljalands, Skóga og víðar hefur vakið athygli. Tómas segir ekkert benda til þess að eftirspurnin sé á undanhaldi. „Ég er sjálfur í ferðaþjónustu, ég hef ekki áhyggjur af því að ekki sé markaður fyrir þetta. Á endanum meta þeir sem standa að framkvæmdum það hvort fjárfestingin er raunhæf.“ Hann bætir við að einstaklingar sem eigi land eigi rétt samkvæmt aðalskipulagi til að nýta það til ólíkra nota, svo lengi sem farið sé eftir lögum og reglum. „Sveitarfélagið fer eftir skipulagslögum og metur áformin með hliðsjón af þeim.“

Mál sem taka tíma

Spurður hvort líklegt sé að áformin verði samþykkt segir Tómas of snemmt að spá fyrir um það. „Það fer eftir því hvað kemur út úr umhverfismatinu og öðrum þáttum. Þetta eru einfaldlega mál sem taka tíma og geta þróast mikið í ferlinu.“

Hann segir jafnframt að sveitarstjórn taki til skoðunar athugasemdir og að unnið sé að málinu af fagmennsku. „Auðvitað verður aldrei hægt að gera alla sátta. En vonandi verður niðurstaðan þannig að sem flestir verði sáttir, þegar þetta er allt komið til lykta.“