„Gerðu þetta annars staðar“

Hópur mótmælenda mætti á hátíðarhöldin á Austurvelli í dag með palestínska fána.

Hópurinn samanstóð af um tíu til tuttugu manns sem létu lítið á sér bera á meðan á athöfninni stóð. Halla Tómasdóttir forseti fór með sitt ávarp og fjallkonan flutti ávarp eft­ir Þór­dísi Helga­dótt­ur.

Þegar æðsta stjórn ríkisins gekk að Alþingishúsinu að loknum hátíðarhöldum fór mótmælendahópurinn að hrópa „þjóðarmorð“ og „frjáls Palestína“. Þegar ráðamenn voru komnir inn í þinghúsið hóf einn mótmælandi að flytja ræðu.

Einhverjir kölluðu að mótmælendum „hættu þessu“ og „gerðu þetta annars staðar“ og bentu þeim á að hátíðarhöld á Austurvelli á þjóðhátíðardegi Íslendinga væri ekki staður eða stund fyrir þessi mótmæli.