Innlent | mbl | 19.6.2025 | 12:13

Höfðu ekki áður komið við sögu lögreglunnar

Tvennt fannst látið á hótelherbergi á Edition hotel. Grunur leikur á því að þau hafi verið svipt lífi. mbl.is/Ólafur Árdal

Lögreglan er búin að yfirheyra frönsku konuna sem er sakborningur í Edition-hótelmálinu. Hvorki hún né maður hennar og dóttir sem létust inni á hótelherbergi höfðu áður komið við sögu hjá lögreglu. Hvorki í Írlandi né Frakklandi, að sögn Ævars Pálma Pálmasonar, aðstoðaryfirlögregluþjóns á miðlægri deild lögreglunnar.

Ævar segir að búið sé að yfirheyra konuna sem er sakborningur í málinu.

„Við höfum náð að gera það. Hún var vissulega með stunguáverka en það hefur gefist tök á því að yfirheyra hana,“ segir Ævar Pálmi.

„Við erum ekki langt á veg komin með rannsóknina og margt er fram undan í rannsóknaraðgerðum. Tæknideildin er á lokametrunum en þá tekur við vinna á rannsóknarstofu og þess háttar,“ segir Ævar.

Frétt af mbl.is

Komu að sakborningnum með stunguáverka

Gestum veitt áfallahjálp

Hann segir að teknar hafi verið skýrslur af vitnum sem komu að málinu með einum eða öðrum hætti, svo sem starfsfólki og hótelgestum. Lögreglan í samvinnu við hótelið kom hótelgestum í samband við Rauða krossinn sem veitir stuðning og áfallahjálp eftir atvikum.

Maðurinn og dóttirin voru úrskurðuð látin á vettvangi. Ævar segir málið einstakt að því leytinu til að það teygir sig til Írlands og Frakklands en fólkið bjó á Írlandi og var frá Frakklandi.

„Þau eru tvö sem grunur leikur á að hafi verið svipt lífi og það gerir málið flókið. Við erum í þó nokkrum samskiptum við írska og franska lögreglu,“ segir Ævar.

Frétt af mbl.is

Ræddu við frönsku lögregluna: Konan enn á spítala

Mikill áhugi erlendis frá

Höfðu þau komið við sögu hjá lögregluembættum ytra?

„Nei, það er ekkert svoleiðis,“ segir Ævar Pálmi.

Hann segir lögreglu finna fyrir miklum áhuga erlendra fjölmiðla á málinu og meðal annars hafi verið veitt viðtöl við írska og franska blaðamenn í dag.

Talsvert álag á lögreglu

Að sögn Ævars Pálma er talsvert álag á miðlæga deild sem rannsakar alvarleg ofbeldisbrot.

„Hjarðarhagabruninn, Súlunesmálið og maður sem drukknaði í sjósundi hafa komið upp á tiltölulega stuttum tíma. Tvö þeirra mála auk þessa nýjasta máls snúast um útlendinga og allt saman krefst þetta samskipta við erlend yfirvöld. Það hægir og þyngir á öllu,“ segir Ævar.

Þá þurfa menn að reiða sig á þýðingar á gögnum og túlkaþjónustu.