Írskir lögreglumenn á leið til landsins

Lögreglumenn frá Írlandi eru væntanlegir til Íslands í næstu viku í tengslum við rannsókn þeirra á hvarfi Jóns Þrastar Jónssonar, en síðast er vitað um ferðir hans í Dyflinni á Írlandi í febrúar 2019.

Í tilkynningu frá lögreglu segir að samþykkt réttarbeiðni liggi fyrir og til standi að taka skýrslur af um 35 manns vegna málsins.

Mun lögreglan á höfuðborgarsvæðinu veita liðsinni vegna þessa.

„Tekið skal fram að fyrirhugaðar skýrslutökur eru á forræði og undir stjórn íslensku lögreglunnar,“ segir í tilkynningunni.

Við rannsókn málsins hefur verið kallað eftir upplýsingum frá almenningi og er það ítrekað hér, en þeim má koma á framfæri í tölvupósti á netfangið abending@lrh.is

• Blogga um frétt