Tæpur fjórðungur notar enga sólarvörn í góðu veðri

Tæpur fjórðungur landsmanna notar aldrei sólarvörn á góðviðrisdögum.

Konur eru duglegri við notkun sólarvarnar en karlar og fólk á aldrinum 35-44 ára er sá aldurshópur sem notar mesta sólarvörn.

Þetta kemur fram í nýrri könnun sem framkvæmd var á vegum Prósents.

Átján prósent nota alltaf sólarvörn, 23% aldrei

Spurningin sem stóð frammi fyrir þátttakendum var: Notar þú sólarvörn á góðviðrisdögum á Íslandi?

Af þeim sem svöruðu sögðust 18% alltaf nota sólarvörn, 24% gera það oft, 35% stundum og 23% sögðust aldrei nota sólarvörn á góðviðrisdögum.

Konur líklegri en karlar

Samkvæmt könnuninni eru karlar mun líklegri til þess að sleppa sólarvörninni en konur, en rúmur þriðjungur karla (35%) segist aldrei nota sólarvörn.

Á móti er einungis einn tíundi kvenna sem segist gera slíkt hið sama.

Karlar eru líklegri til að sleppa sólarvörninni en konur. Graf/Prósent

Börn og ungmenni viðkvæmust fyrir sólinni

Fólk á aldrinum 35-44 ára er duglegast við að verja sig fyrir sólinni, en fólk yfir 65 ára gerir það síst.

Þrjátíu prósent ungmenna á aldrinum 18-24 ára nota aldrei sólarvörn, en samkvæmt vef Krabbameinsfélagsins er húð barna og unglinga í mestri hættu á sólskaða þar sem hún sé viðkvæmari en húð fullorðinna.

Aldursdreifing þeirra sem nota sólarvörn. Graf/Prósent

• Blogga um frétt