Liggur undir feldi: „Staðan er ekki sjálfbær“

Lilja Dögg Alfreðsdóttir, varaformaður Framsóknar, liggur undir feldi og íhugar mögulegt formannsframboð í flokknum en hún segir stöðu flokksins ekki vera sjálfbæra. Þessa dagana fer hún um landið og á fundi við framsóknarmenn.

Þetta segir hún í samtali við mbl.is en Framsókn mældist með 4,5% fylgi í þjóðarpúlsi Gallup sem kom út í gær.

„Ég íhuga það [formannsframboð] því margir hafa skorað á mig,“ segir Lilja og bætir við að hún muni meta stöðuna gaumgæfilega.

Frétt af mbl.is

Ekki rætt við Lilju um formannsframboð

Ferðast um landið og hittir flokksmenn

Síðasta laugardag fundaði hún með flokksmönnum á Húsavík og á laugardaginn verður hún í Borgarnesi.

„Það sem ég er núna að gera er að heyra í flokksmönnum vegna þess að augljóst er að staðan er ekki sjálfbær fyrir Framsóknarflokkinn, sem er búinn að gera sig mjög gildandi í talsvert langan tíma í sögu þjóðarinnar. Nú er það samtal við flokksmenn og grasrótina um hvað sé best að gera,“ segir Lilja.

Verður flokksþingi flýtt?

Flokksþing Framsóknar velur forystu flokksins en samkvæmt áætlun á sá fundur að fara fram næsta vor, rétt fyrir sveitarstjórnarkosningar.

Í síðustu þingkosningum fékk Framsókn minnsta fylgið í sögu flokksins og í kjölfarið hafa margir Framsóknarmenn kallað eftir því að flokksfundi verði flýtt til þess grasrótin geti farið yfir stefnumálin og kosið um forystuna á nýjan leik.

Fyrr á árinu var tillaga um að halda flokksþingið fyrir áramót felld naumlega í miðstjórn Framsóknar en nú gæti verið komið annað hljóð í strokkinn í ljósi áframhaldandi fylgistaps Framsóknar. Miðstjórn fundar á ný um miðjan næsta mánuð þar sem gert er ráð fyrir því að tillaga um að flýta flokksþingi fyrir áramót verði lögð fram.

„Þetta er algjörlega í höndum grasrótarinnar. Við finnum að það eru deildar meiningar um hvort eigi að flýta þessu. Ég sagði í upphafi árs að það væri skynsamlegt út af sveitarstjórnarkosningunum,“ segir Lilja.

Sveitarstjórnarmenn spenntir fyrir komandi kosningum

Framsókn fékk mjög góða kosningu víða um land í síðustu sveitarstjórnarkosningum árið 2022.

Spurð hvort það sé ekki hætt við því að flokkurinn tapi fylgi í flestum sveitarfélögum ef fylgið tekur ekki að rísa á næstunni segir Lilja að sveitarstjórnarmenn Framsóknar séu spenntir fyrir komandi kosningum enda búnir að vera „hörkuduglegir“ í sínum störfum út um allt land.

• Blogga um frétt