Takmörkun aðgangs að Heiðmörk óviðunandi

„Í fyrirliggjandi skipulagslýsingu vegna nýs deiliskipulags fyrir Heiðmörk kemur fram að takmarka eigi stórlega aðgang almennings að Heiðmörk í nafni vatnsverndar. Ekkert bendir hins vegar til þess að núverandi útivist á svæðinu hafi neikvæð áhrif á vatnsgæði. Með slíkri breytingu væri almennur réttur borgara til að njóta stærsta útivistarsvæðis höfuðborgarsvæðisins takmarkaður verulega,“ segir í bókuninni.

Telja sjálfstæðismenn að unnt sé að tryggja gæði neysluvatns án þess að skerða stórlega aðgang almennings að Heiðmörk. Fyrirhugaðar lokanir, þar sem loka eigi öllu grannsvæði vatnsverndar fyrir bílaumferð, orki tvímælis. Ófullnægjandi kynning og rökstuðningur fyrir takmörkunum á aðgangi að Heiðmörk hafi þegar haft neikvæð áhrif, t.d. vegna skipulagðra ferða skólabarna sem tæpast ógni vatnsvernd.

Á fundinum var samþykkt tillaga borgarstjóra um stofnun samráðshóps um Heiðmörk til að tryggja að hugað sé að hagsmunum íbúa, nærsamfélags og helstu hagaðila varðandi deiliskipulagið, vera til stuðnings og ráðgjafar til að tryggja öryggi grunnvatns, skógræktar og að svæðið nýtist áfram til útivistar.

Stofnun hópsins segir fulltrúi Framsóknarflokksins í bókun vekja furðu, enda hafi meirihlutaflokkarnir í sumar fellt tillögu flokksins um sama mál. Þar hafi verið lagt til að fulltrúar allra flokka í borgarstjórn fengju aðkomu að málinu og gætu átt í milliliðalausu samtali við alla hagaðila til að tryggja bæði útivist og vatnsvernd. „Framsókn gagnrýnir harðlega vandræðaleg vinnubrögð meirihlutans í þessu máli,“ segir í bókuninni.