Milljarða vantar í landbúnaðinn

„Ef þróun verðlags er önnur en forsendur fjárlaga á hverju ári skal mismunur leiðréttur í fjárlögum næsta árs. Þetta kemur skýrt fram í ákvæðum samninganna en slíkt hefur ekki verið gert. Nú telst okkur til að það vanti inn í kerfið um 3,7 milljarða króna vegna áranna 2017-2024,“ segir framkvæmdastjóri BÍ.

Vinna er nú hafin meðal fulltrúa bænda og stjórnvalda um gerð næstu samninga um starfsskilyrði landbúnaðarins, sem taka eiga gildi í byrjun árs 2027.

„Við köllum eftir samtali núna við fjárlaganefnd. Núgildandi kerfi er að miklu leyti ágætt, en það þarf meiri fjármuni í pottinn til að það virki sem skyldi. Einnig þarf eftirfylgnin með íþyngjandi Evrópuregluverki sem kemur í gegnum EES-samninginn að vera betur háttað af hálfu stjórnvalda. Oft eru til staðar heimildir til að létta á eða rýmka íþyngjandi skilyrði en alltof algengt að þær séu ekki nýttar, hvað sem því veldur,“ segir Margrét Ágústa og að síðustu:

„Tollverndin er annað mikilvægt mál og ein mikilvægasta grunnforsenda starfsskilyrða greinarinnar. Það að hún virki ekki sem skyldi leiðir til þess að markaðshlutdeild innlendrar framleiðslu minnkar og það veikir m.a. fæðuöryggi okkar hér á Íslandi, og það á þeim óvissutímum sem við lifum á nú. Þá er staðreynd að flestöll ríki heims eru að gefa í hvað varðar innlenda framleiðslu enda ekki hægt að treysta á innflutning til lengri tíma litið. Nú mun virkilega reyna á stjórnvöld að tryggja og bæta starfsskilyrði landbúnaðarins líkt og þeim ber lögum samkvæmt að gera.“