Rammasamningur við lækna í uppnámi

Frumvarpið gerir Sjúkratryggingum Íslands kleift að ákveða hvernig gjaldskrá lítur út og takmarka magn þjónustu og heildarendurgreiðslu til hvers þjónustuveitanda.

Ragnar segir að áhrifanna myndi gæta þannig að læknar myndu halda áfram að veita þjónustu en sjúklingarnir þyrftu að leggja út fyrir reikningum og innheimta það svo sjálfir hjá Sjúkratryggingum.

„Í dag er þetta þannig að þegar þú ferð til læknis þá greiðir þú bara þinn hluta en hinn hlutinn er greiddur til læknisins í gegnum Sjúkratryggingar Íslands, sem er mikið hagræði fyrir sjúklingana og Sjúkratryggingar, en setur okkur í erfiða stöðu, því við myndum hætta slíkri greiðslumiðlun og sjúklingarnir yrðu að sjá um það sjálfir.“

Setja samningsmarkmið í lög

Spurður hvort þessar tillögur hafi átt sér einhvern aðdraganda segir Ragnar að þær séu kunnar þeim sem hafa setið við samningaborðið í samskiptum Læknafélagsins við Sjúkratryggingar.

„Við sátum í mörg hundruð klukkutíma við samningaborð og náðum niðurstöðu með sérstakri hátíðarviðhöfn í Ráðherrabústaðnum. Tveimur árum síðar ætlar svo ríkisvaldið að snúa þeim samningi við með því að setja í lög þau samningsmarkmið sín, sem engin leið var að semja um fyrir okkur.“

Ragnar segist líta þetta mál mjög alvarlegum augum.

„Við höfum gert samning við ríkisvaldið og svo tveimur árum seinna setur ríkið lög á samninginn. Ég veit ekki til þess að nokkur starfi svona,“ segir Ragnar Freyr Ingvarsson, formaður Læknafélags Reykjavíkur.

Nánar má lesa um málið í Morgunblaðinu í dag