Afreksmenn glíma líka við þunglyndi

Hún segist í erindinu ætla að reyna að spegla markmið venjulegra manneskju við afreksmanneskju.

„Við viljum standa okkur vel í vinnunni, vera frábærir foreldrar, eiga gott félagslíf, sinna makanum, vera smart, borða hollt, hreyfa okkur og hvílast nægilega. Þetta reynist mörgum erfitt því það eru miklar kröfur sem sjálfsræktariðnaðurinn leggur á okkur með því að vera besta útgáfan af okkur sjálfum.“

Sjálfsræktariðnaðurinn tekur hús víða og segir Hafrún að við fáum endalaus skilaboð um að gera betur á flestum sviðum til að höndla hamingjuna.

„Eðli málsins samkvæmt gengur líf afreks íþróttafólks út á að hámarka afköst, synda hraðar, kasta lengra og svo framvegis. Þegar mjög vel gengur er þetta fólk sett á stall og við lítum á það sem ofurmanneskjur, sem það er í einhverjum skilningi en er fyrst og síðast manneskjur sem takast á við streitu og alls kyns vandamál eins og við hin.“

Spurð hver sé lykillinn að því að ná sem bestum árangri jafnframt því að halda uppi lífsgæðum segir Hafrún að í stuttu máli megi segja að það sé að vera meðalgóð í því sem við tökum okkur fyrir hendur.

„Nota ókeypis og sígild sjálfshjálparráð, stunda hóflega hreyfingu, borða öfgalaust, vera innan um gott fólk og reyna að láta gott af sér leiða.“

Erindi Hafrúnar nefnist Ofurmanneskja ég – Í skugga fullkomnunar og verður streymt á hr.is í dag frá klukkan 12.15 til 12.45.