Innlent | mbl | 8.10.2025 | 21:10 | Uppfært 9.10.2025 12:10

Stórt tré lokar götu og sjór frussast á land

Stórt tré rifnaði upp með rótum í Hlyngerði í Reykjavík í kvöld en bálhvasst hefur verið í borginni með snörpum vindhviðum.

Tréð þverar götuna og lokar botnlanganum algjörlega fyrir bílaumferð en ekki er hægt að komast til eða frá tveimur húsum í botnlanganum. Hægt er þó að komast leiðar sinnar gangandi.

Snorri Steinn Gíslason, íbúi í Hlyngerði, ræddi við mbl.is en hann komst ekki í ræktina í kvöld vegna trésins.

Tréð þverar götuna og lokar botnlanganum algjörlega fyrir bílaumferð. Þá hefur það lagst á öryggisgirðingu og laskað hana. Samsett mynd/Snorri Steinn Gíslason

Gatan þrengd vegna framkvæmda

Segir hann að framkvæmdir standi yfir í götunni vegna vatnsleka sem þar varð og búið sé að setja upp öryggisgirðingar vegna skurða hér og þar. Tréð hafi m.a. lagst á slíka girðingu og laskað hana. Vegna framkvæmdanna hafi gatan verið þrengd og tréð hafi nákvæmlega fallið á þann hluta götunnar sem er opinn.

Snorri segist ekki vita hvenær verði farið í einhverjar aðgerðir vegna trésins en viðurkennir að fjölskylda hans sé nú þegar farin að velta fyrir sér að ganga í málið. Segir hann nágranna þeirra ekki vera heima og ef ekkert verði að gert muni þeir ekki eiga gott með að komast heim til sín.

Víðitré rifnaði upp með rótum og lenti á glugga

Öldurót víða

Í Garðinum í Suðurnesjabæ frussast sjórinn upp á bryggjuna. Gríðarlegir kraftar eru hér að verki.

Sjórinn frussast af feiknarkrafti upp á bryggjuna í Garðinum. Ljósmynd/Aðsend

Mikið öldurót er víða á Faxaflóa vegna veðursins og gusaðist sjór yfir þjóðveginn á Kjalarnesi neðan við Vallá í kvöld. Þórður Bogason tók myndskeið af brimrótinu.