Tap vegna afbókana 870 milljónir

Þar kemur einnig fram að beinar afbókanir skemmtiferðaskipa vegna nýrrar gjaldtöku á yfirstandandi ári séu níu talsins, þær séu orðnar 24 á næsta ári og 19 á árinu 2027. Fulltrúar frá Grundarfjarðarhöfn hafi í seinasta mánuði tekið þátt í kaupstefnunni Seatrade Europe í Þýskalandi líkt og þeir hafi gert í mörg ár. Umræðan hafi ávallt verið jákvæð þar til nú. „Í ár var hljóðið hins vegar annað. Skipafélögin lýsa yfir þungum áhyggjum af innviðagjaldi og afnámi tollfrelsis í hringsiglingum og þeirri miklu óvissu sem það skapar,“ segir enn fremur.

Ljóst sé að þetta komi til með að hafa mikil áhrif á Grundarfjörð og Snæfellsnes í heild. Í tvo áratugi hafi mikil innviðauppbygging átt sér stað á höfninni og mikil vinna verið lögð í að byggja upp sterkt tengslanet og traust svo skipafélögin viti að hverju þau ganga þegar þau koma til hafnar í Grundarfirði. „Frekari uppbygging er áformuð, t.d. með nýrri flotbryggju og endurskipulagningu hafnarsvæðis, en ákvarðanir stjórnvalda setja stórt strik í reikninginn á þessari uppbyggingu.“