408 börn á biðlista í borginni

Foreldrar eru orðnir óþreyjufullir um að hægt verði að koma á þessari þjónustu, því ekki geti allir leitað til afa og ömmu, eða stundað vinnu frá heimilinu þegar börnin eru búin í skólanum eftir hádegið. „Við bindum vonir við að þetta fari að lagast en vissulega er þetta slæmt þegar komið er fram í miðjan október,“ segir Ólafía.

400 fleiri umsóknir í ár

„Í ár hefur reynst erfiðara að manna frístundaheimilið Stjörnuland en í fyrra,“ segir Þóra, en bætir við að líklega takist að fullmanna frístund fyrir 2. bekk á næstu dögum. Hún segir að fleiri umsóknir séu um frístundaheimilin í ár en í fyrra. „Það eru alls 4.219 umsóknir í frístundaheimili í borginni sem er fjölgun um 400 börn á milli ára.“

Þóra segir að svipað sé upp á teningnum í öðrum frístundaheimilum sem heyra undir Frístundamiðstöðina Brúna sem sér um tíu heimili í Grafarvogi, Grafarholti og Árbæ. „907 börnum hefur verið boðin dvöl, þar af 103 börnum í hlutavistun en 258 eru á biðlista. Þannig að staðan er svipuð.

Við erum að gera allt sem í okkar valdi stendur til þess að manna frístundaheimilin með góðu fólki og biðlistatölur taka breytingum jafnt og þétt. Mikið er lagt upp úr gæðum í frístundastarfinu og það eru sameiginlegir hagsmunir okkar og foreldra að það náist að ráða gott og hæft fólk til starfa,“ segir Þóra að lokum.