Senn hleypt á Vatnsfellsvirkjun eftir viðgerð

Vatni verður á næstunni að nýju hleypt á vélar Vatnsfellsvirkjunar en inntakslón orkuversins var tæmt í ágúst síðastliðnum. Það var gert þegar í ljós komu sprungur í jarðlögum sem liggja þvert á inntaksskurð.

Strax var ljóst að grípa þyrfti til aðgerða og því þurfti að stöðva rennsli úr Þórisvatni að virkjuninni sem er sú efsta í landinu af alls sjö aflstöðvum á Þjórsár- og Tungnaársvæðinu.

Ístak var verktaki við viðgerðir á aðrennslisskurðinum sem fólust í grautun til að þétta sprungur og að hluta til steyptum veggjum til að þétta skurðinn. Suðurverk kom einnig að verkefninu við hreinsun á efni upp úr frárennslisskurði virkjunarinnar, en efni sem rofnaði úr hlíðinni ofan stöðvarhússins hafnaði að hluta til þar.

Hagfelldur vatnsbúskapur hefur komið í veg fyrir að stöðvun Vatnsfellsstöðvar raskaði framboði rafmagns, segir Gunnar Guðni Tómasson, framkvæmdastjóri vatnsafls hjá Landsvirkjun. Raunar þykir orkubúskapur standa ágætlega nú um stundir, sbr. að í sumar var gott innrennsli í uppstöðulón, svo sem Þórisvatn sem er bakbein Vatnsfellsstöðvar og annarra aflstöðva á því svæði. Sömu sögu er að segja um Blöndulón nyrðra og Hálslón, sem er forðabúr Kárahnjúkavirkjunar.