Flugrekendur standi í skilum

Umrædd reglugerð var sett fimmtudaginn í síðustu viku, en sama dag flaug af landi brott eina flugvél hins gjaldþrota flugfélags Play sem stödd var hér á landi þegar félagið fór í þrot. Fór vélin án þess að upp hefði verið gerð hálfs milljarðs króna skuld félagsins við Isavia vegna lendingargjalda.

Eyjólfur segir að reglugerðin varði fyrirtæki sem fari í þrot, en ekki fyrirtæki í fullum rekstri.

„Það er mjög mikilvægt að flugrekandi standi skil á gjöldum,“ segir Eyjólfur og segist ekki skilja gagnrýnina.

Segir Eyjólfur að ákvæði sé í lögum um loftferðir sem mæli m.a. fyrir um að rekstraraðila flugvallar sé heimilt að innheimta gjöld til að standa undir rekstri flugvallar sem og vegna þeirrar aðstöðu, búnaðar og mannvirkja sem starfsemi tengd flugsamgöngum nýti á flugvöllum. Skuli þau gjöld tryggð með lögveði í loftförum eða loftfarshlutum eiganda eða umráðanda loftfars sem skráð er hér á landi. Gjöld vegna flugumsjónar skuli einnig tryggð með lögveði í því loftfari sem í hlut eigi, en lögveð er trygging fyrir skuld.

„Þegar við fórum að rýna þetta sáum við að það er gat í lögunum hvað varðar afskráningu loftfara. Þar er hins vegar reglugerðarheimild sem segir að loftfar skuli tekið af skrá þegar öðrum skilyrðum er fullnægt sem ráðherra tilgreinir í reglugerð. Reglugerðin er einfaldlega til þess að tryggja að skuldir lögveðshafa verði gerðar upp. Lögveðið væri haldlaust ef það skortir þessi skilyrði við afskráningu loftfara. Til hvers væri að hafa ákvæði í lögum um lögveð sem hafa ekki þýðingu. Vilji löggjafans er alveg skýr hvað þetta varðar,“ segir Eyjólfur.