Innlent | mbl | 13.10.2025 | 17:45 | Uppfært 14.10.2025 11:36

Bókaþjófur ásælist bók Ólafs Jóhanns

Ólafur Jóhann Ólafsson rithöfundur. mbl.is/Eggert Jóhannesson

Jólabókaflóðið er farið af stað og mikil eftirvænting er eftir sumum bókanna sem koma út í ár. Í dag hefur Ólafur Jóhann Ólafsson rithöfundur fengið tvo tölvupósta frá „Páli Valssyni“ útgáfustjóra Bjarts og Veraldar þar sem hann er beðinn um að senda Kvöldsónötuna á PDF-formi en bókin er væntanleg úr prentun í byrjun nóvember.

Í morgunsárið sendi hann svohljóðandi póst á Ólaf Jóhann: „Hæ, Geturðu sent mér pdf? Ég finn ekki það núna. bkv.pv.“ Pósturinn var sendur úr netfanginu pall.vallsson@gmail.com og vakti það strax athygli viðtakandans að tvö L voru í Vallsson.

Frétt af mbl.is

Varar við sjálfum sér og talar góða íslensku

Þegar þrjóturinn fékk engin svör sendi hann aftur skeyti eftir hádegi og nú sást netfangið ekki, heldur aðeins „Páll Valsson“ en þar skrifaði „Páll“: „Hæ, Ég er í Frankfurt og var að leita að handriti. Geturðu sent mér það? bkv. pv“.

Samkvæmt upplýsingum frá Pétri Má Ólafssyni hjá Bjarti/Veröld hafði hinn rétti Páll Valsson ekki beðið Ólaf Jóhann um neitt PDF enda ágætlega grandvar maður og ekki gjarn á að týna dýrmætum handritum.

Pétur Már Ólafsson, Páll Valsson og Ragnheiður Elfa Þorsteinsdóttir. Ljósmynd/Valgardur Gíslason

Hin árlega bókamessa hefst í Frankfurt á miðvikudaginn svo það er ljóst að mati Péturs Más að þrjóturinn er með lágmarksinnsýn í bókabransann. Meiri athygli veki kannski að hann skuli vera með netfang Ólafs Jóhanns sem lítið er í umferð.

Frétt af mbl.is

Bíræfinn bókaþjófur aftur kominn á kreik

Svo sem kunnugt er herjaði bókaþrjótur á útgefendur fyrir fáeinum árum og reyndist það vera Filippo Bernardini sem hlaut síðan dóm fyrir brot sín. Ólíklegt verður að teljast að hann sé kominn aftur á kreik því að hann fékk háa sekt, þótt hann slyppi við fangelsisdóm.

Þó er víst að einhver bókþyrstur herjar á útgefendur og höfunda í von um að komast yfir væntanlegar bækur áður en jólavertíðin fer í fullan gang og ljóst að honum er mjög í mun að komast yfir nýjustu skáldsögu Ólafs Jóhanns Ólafssonar.