Daði Már Kristófersson fjármálaráðherra tekur undir orð seðlabankastjóra um að vaxtalækkun sé nær á sjóndeildarhringnum en vaxtahækkun.

„Það kvað við nýjan tón hjá Seðlabankanum á síðasta vaxtaákvörðunarfundi og greinilegt að það er styttra í vaxtalækkun,“ segir Daði í samtali við mbl.is. Ástæðan sé einfaldlega mat seðlabankans á stöðu hagkerfisins. Þar séu greinileg merki um að þenslan sé að minnka.

„Ég tek þess vegna undir. Ég tel það fullkomlega eðlileg viðbrögð Seðlabankans að gera ráð fyrir því að vaxtalækkunarferlið hefjist á ný fljótlega,“ segir hann. Erfitt sé þó að segja til um hvenær lækkunin verði.

„Seðlabankar eru þannig að þeir eru nú yfirleitt mjög varkárir í yfirlýsingum. Telji þeir ástæðu til þess að gefa einhver skilaboð um að vaxtalækkunarferlið hefjist þá er það fyrr en síðar.“

Stýrivextir héldust óbreyttir í október

Peningastefnunefnd Seðlabankans ákvað í síðustu viku að halda stýrivöxtum óbreyttum.

Í spurningum greiningaraðila á fundinum og svörum Seðlabankastjóra mátti greina að áhyggjur væru jafnvel af því út frá verðbólgutölum og orðalagi peningastefnunefndar að næsta ákvörðun gæti hallast til hækkunar vaxta frekar en lækkunar.

Ásgeir Jónsson seðlabankastjóri sagði nokkuð ákveðið í nýlegu viðtali á mbl.is að allar nýjar fréttir fyrir hagkerfið væru af neikvæðum toga. Meðan ekki komi til ófyrirséðra atburða sem ýti hagkerfinu hraustlega af stað sé lækkun vaxta því nær en hækkun þeirra.

Seðlabankinn muni þó ekki hika við að hækka stýrivexti ef þess þarf.

Frétt af mbl.is

„Held að við séum nær vaxtalækkun“

Tengdar fréttir

Vextir á Íslandi

Segir vaxtaviðmiðin allt of flókin

• „Setja allan fyrirvara heimsins“
• Komi í ljós á næstunni hvort viðmiðið dugi
• Skoða hvort og hvernig tengja megi ný lán viðmiðinu
• Seðlabankinn birtir viðmiðið

» Fleiri tengdar fréttir

• Blogga um frétt