Innlent | mbl | 15.10.2025 | 15:36

Eldri borgarar kenni íslensku í leik- og grunnskólum

Halla Hrund Logadóttir, þingmaður Framsóknarflokksins. mbl.is/Eggert Jóhannesson

Framsóknarflokkurinn hefur lagt fram þingsályktunartillögu sem miðar að því að gefa eldri borgurum kost á því að taka þátt og fá greitt fyrir íslenskukennslu í leikskólum, grunnskólum og í atvinnulífinu án þess að það hafi áhrif á bætur eða almannatryggingakerfið.

Þetta sagði Halla Hrund Logadóttir undir liðnum störf þingsins á Alþingi fyrr í dag.

Sagði hún að í þingsályktuninni væri fyrst og fremst verið að horfa á stuðning við að hjálpa fólki að æfa sig í íslensku.

Aukin hætta á árekstrum

„Það er það sem skiptir máli því að við vitum öll að án þess að fólk tali sama tungumálið er aukin hætta á árekstrum og við sjáum það ef við lítum til landanna í kringum okkur að það verða árekstrar þegar fram líða stundir ef við rísum ekki upp og tökumst á við þetta viðfangsefni núna.“

Sagði þingmaðurinn þörfina vera mikla og nefndi að árið 2012 hafi 7,5% íbúa landsins verið af erlendum uppruna en það hlutfall væri komið upp í 20% í dag, ef ekki meira sums staðar á landinu.

Gætu orðið öflugri hluti af samfélaginu

Þá væri margvíslegur árangur af tillögunni, þá fyrst og fremst fyrir fjölskyldur af erlendum uppruna sem myndu ná að verða öflugri hluti af samfélaginu.

„Það er líka gríðarlega mikið vægi í því að fá eldri borgara inn í þetta verkefni og af hverju? Jú, vegna þess að eldri borgarar eru vitringar okkar samfélags. Þar er viskan. Þar er þekking á menningu okkar og sögu og þess vegna getur þetta nýst til að kynna hana sömuleiðis og efla tengsl á marga vegu.“