Milljarði þegar verið eytt í Vörðuskóla

Fulltrúar Sjálfstæðisflokksins í ráðinu, þau Helgi Áss Grétarsson og Marta Guðjónsdóttir, sátu hjá við afgreiðslu málsins. Þau segja í bókun sem þau gerðu á fundinum að að meðtöldum kostnaði við kaup á byggingunni á sínum tíma hafi borgin fjárfest fyrir meira en 1.000 milljónir í húsnæðinu. Með framkominni tillögu sem samþykkt var á fundinum sé ætlunin að klára framkvæmdir við Vörðuskóla og nýta svo húsnæðið sem skóla er taki við nemendum sem hverfa þurfi frá öðrum skólabyggingum, svo sem vegna mygluframkvæmda og annarra viðgerða.

Bent er á að engin kostnaðaráætlun fylgdi tillögunni og ekki hafi verið tekin ákvörðun um að veita fjárheimild til að fylgja tillögunni eftir. Með hliðsjón af fjárhagslegri framvindu verkefna sem tengjast Vörðuskóla og óvissu um kostnað sitji fulltrúarnir hjá við afgreiðslu málsins.

Framangreindur milljarður skiptist þannig að 263 milljónum var varið til kaupa á húsinu á sínum tíma, en endurbæturnar sem enn sér ekki fyrir endann á hafa kostað 751 milljón.

Segja fulltrúar Sjálfstæðisflokksins í ráðinu að þótt þeim hafi þótt skynsamlegt að klára bygginguna í þágu skólastarfs í borginni þá telji þeir óforsvaranlegt og óábyrgt að styðja málið í ljósi sögu borgarinnar um framúrkeyrslu í framkvæmdum og þess að engar upplýsingar liggi fyrir um kostnað við að gera bygginguna tilbúna fyrir skóla- og frístundastarf.