Skorað á ráðherra að draga tillögu til baka

Áskorunin var samþykkt á sameiginlegum fundi sveitarfélaga með íbúa færri en 1.000 og er þar skorað á innviðaráðherra „að draga til baka tillögu innviðaráðuneytis um afnám íbúalýðræðis sem felst í drögum að nýjum sveitarstjórnarlögum sem nú liggja fyrir í samráðsgátt stjórnvalda“, segir í áskoruninni.

Segir þar einnig að sveitarfélögin fordæmi þá vegferð stjórnvalda að svipta íbúa fámennustu sveitarfélaga landsins réttinum til að taka ákvörðun um tilvist sveitarfélags síns með því að fyrirskipa sameiningar.

„Með þessu er helgasti réttur sveitarstjórnarstigsins, íbúalýðræðið, afnuminn og valtað yfir ákvörðunarvald sveitarfélaga, ekki aðeins hinna minnstu, heldur einnig þeirra sveitarfélaga sem þeim verður uppálagt að sameinast. Verði ráðherra veitt vald til þess að hlutast til um sameiningu sveitarfélaga með þessum hætti er gerður að engu sá réttur íbúa að kjósa sér fulltrúa til þess að fara með umboð og málefni viðkomandi sveitarfélags. Um er að ræða skref sem grefur undan lýðræði og hlutverki kjörinna fulltrúa,“ segja sveitarstjórnirnar.

„Frumvarpið sýnir mikla óvirðingu við íbúa minni sveitarfélaga og óþolinmæði gagnvart þróun sem er í gangi. En nokkur af fámennustu sveitarfélögunum hafa þegar sameinast eða samþykkt sameiningu, s.s. Akrahreppur, Skagahreppur, Svalbarðshreppur og Skorradalshreppur. Önnur eiga í viðræðum á misjöfnu stigi og getur frumvarpið haft afar neikvæð áhrif á anda þeirra viðræðna og mögulegra sameininga,“ segir þar.

Segir enn fremur að sveitarfélögin sem að áskoruninni standa mótmæli harðlega fyrirliggjandi áformum þar sem þau svipti sveitarfélög sjálfsákvörðunarrétti sínum og íbúa sínum lýðræðislegu réttindum.

Undir áskorunina rita fulltrúar 19 sveitarfélaga, þar af 17 oddvitar, en tveir sveitarstjórar.